गौतम “उदय”
नसोध शब्दमा, हाम्रो चिनारी
खोज आफैले, को हो नेपाली
हारको इतिहास, भेटेनौ भने
बिपदामा रमिते, देखेनौ भने
बुझ त्यो हो नेपाली
बुझ त्यो हो नेपाली ।
आउन सक्छन, बिपत्ति ठुला
लाग्न सक्छन, चोट गहिरा
बिपत्तिसंग, हारेन भने
दुखमा आँसु, झारेन भने
बुझ त्यो हो नेपाली
बुझ त्यो हो नेपाली ।
उभिएर जगमा, मानवताको
गरेर अनुभूति, दुख अरुको
नजिक र टाढाको, भनेन भने
मैं खाऊँ मैं लाऊँ, गरेन भने
बुझ त्यो हो नेपाली
बुझ त्यो हो नेपाली ।
देखिए पनि, किसिम-किसिमका
तल तराई र, माथि हिमालका
ढलेर पनि, उठ्यो भने
सारा एकसाथ, जुट्यो भने
बुझ त्यो हो नेपाली
बुझ त्यो हो नेपाली ।
