- टुँडीखेलमा भूकम्प पीडितले टाँगेको पाल हावा पानीले उडाइदिएको छ । तस्वीर : श्रीधर पौडेल
९ जेठ, काठमाडौं । राजधानीमा शनिवार अकस्मात आँधी हुरी चल्नुका साथै पानी परेपछि जनजीवन अातंकित बन्याे। अाँधीका कारण रूखले किच्याउँदा स्वयंभूमा एक महिलाको मृत्यु भएको छ भने खुल्लामञ्चमा टाँगिएका त्रिपाल अाँधीले उडाएपछि भूकम्प पीडतकाे भागाभाग भएकाे छ ।
हावाहुरी बन्द भएपछि पीडितहरु आफ्नो अस्थायी बासस्थान मिलाउन र त्रिपाल टाँग्न थालेका थिए । प्रहरीहरु पनि गैंतीबेल्चासहित पीडितहरुलाई सघाउन टुँडीखेल पुगेका थिए ।
अाँधीका कारण अन्तराष्ट्रिय विमानस्थलसमेत एक घण्टा अबरुद्ध भयो । भूकम्प पीडितको उद्धारमा परिचालित २ वटा हेलिकोप्टर काठमाडौंमा अवतरण हुन नसकेपछि रामेछापमा अवतरण गरियाे।
पत्नीको मृत्यु, पति घाइते
स्वयंभू सानो भर्याङमा हुरीले ढालेको रुखले किच्दा एक महिलाको मृत्यु भएको छ । आँधी हुरीले मोटरसाइकल ढाल्न लागेपछि रोक्न खोज्दा अचानक रुख ढलेर किच्दा ३२ वर्षीया लक्ष्मीकुमारी सुवेदी दाहालको घटनास्थलमै मृत्यु भएको प्रहरीले जनाएको छ ।
महानगरीय प्रहरी वृत्त स्वयंभूका अनुसार मृतक लक्ष्मीका पति मोटरसाइकल चालक ४२ वर्षीय गणेश दाहाल घाइते भएका छन् ।
बुढानीलकण्ठ नगरपालिका ३ का बासिन्दा सुवेदी दम्पत्ति बा ३४ प ११०६ नम्बरको पल्सर मोटरसाइकलमा स्वयंभूबाट बालाजुतर्फ गइरहेका थिए । घाइते गणेश दाहालको उपचार भइरहेको र अवस्था खतरामुक्त रहेको प्रहरीले जनाएको छ ।
यसैबीच हावाहुरीले रुख ढाल्दा पशुपति क्षेत्रमा एक ट्याक्सी क्षतिग्रस्त भएको छ । ट्याक्सी चालक घाइते भएका छन् ।
विमानस्थल एकघण्टा अवरुद्ध
तीब्र गतिमा आएकाे आँधीहुरीले नेपालको एकमात्र अन्तराष्ट्रिय विमानस्थल एकघण्टा अबरुद्ध भएको थियाे । सवा पाँच बजेदेखि ६ बजेर २० मिनेटसम्म होल्डिङ भएको नेपाल नागरिक उड्डयन प्राधिकरणका महाप्रवन्धक वीरेन्द्र श्रेष्ठले जानकारी दिए । ‘ठूलो हुरी चलेर रन वेमा जस्ता पाता उडाउन थालेपछि केहीबेर होल्डिङ भए पनि अहिले उडान अवतरण सुरु भैसकेको छ,’ श्रेष्ठले भने ।
केहीबेरको होल्डिङपछि फ्लाइ दुबईको विमान अवतरण गरेको थियो ।
दुई हेलिकोप्टर रामेछाप फर्किए
हावाहुरीले काठमाडौंमा अवतरण गर्न नसकेपछि दुईवटा हेलिकोप्टर रामेछापमा अवतरण गरेका छन् । जुलियट जुलु र जुलियट डेल्टा हेलिकोप्टर काठमाडौं अवतरण गर्न नसकेपछि रामेछापमा आकस्मिक अवतरण गरेको श्रेष्ठले बताए । ती दुबै हेलिकोप्टर भूकम्प पीडितहरुको उद्धारमा खटिएका थिए ।
गोर्खामा असिना पानी
एक्कासी मौसममा आएको परिवर्तनलाई कतिपयले भूकम्पसँग जोडेर अपब्याख्या समेत गरेका थिए । तर भूकम्प र शनिबारको आँधी-पानीको कुनै सम्वन्ध नभएको मौसम विज्ञान विभागका महानिर्देशक ऋषीराम शर्माले बताए ।
‘भूकम्पसँग यसको कुनै सम्वन्ध छैन, हामीले पानी पर्ने विहानै भनिसकेका थियौं,’ उनले भने ।
मौसमविदहरुका अनुसार गोर्खा, धादिङ, लम्जुङ लगायतका जिल्लाका केही स्थानमा हावाहुरीसँगै असिना पानीसमेत परेको थियो । पानीले पहाडी जिल्लामा पहिरो गएर केही सडकहरु अबरुद्ध भएको प्रारम्भिक जानकारी आएको छ ।
हावाहुरीपछि भूकम्प पीडित बसेको टुँडीखेलमा यस्तो देखियो
तस्वीर : श्रीधर पौडेल