काठमाण्डौ । मातृभूमीलाई दुःख पर्दा बिदेशलाई कर्मभूमी बनाएका थुप्रै नेपालीहरु आफ्ना दाजुभाईको सहयोग अभियानमा जुटे ।
यस्तो दुःखका बेला कसको हैसियत कति भनेर हेरिएन, एक डलरमात्र किन नहोस् सवैले आफ्नो खल्ती खुला गरिदिए ।
नेपाललाई सहयोग गर्न बिदेशमा ठूलो धन दौलत आर्जन गरिरहनु पर्दैन । मातृभूमीको दर्दलाई महसुस गर्ने हो भने जस्तो आ-आफ्नो ठाउँबाट धेरै गर्न सकिन्छ भन्ने उदाहरण दिएका छन् चीनमा कार्यरत एक नेपाली प्राध्यापकले ।
चीनको सान्सी प्रान्तको सियान बिश्वविद्यालयमा क्यान्सर रोगबारे अनुसन्धान र प्राध्यापन गरिरहेका प्राध्यापक डा. राजीवकुमार झाले यस्तै उदाहरण दिएका छन् आफ्नो साढे ९ महिनाको तलव भूकम्प पिडीतलाई दिएर ।
बिश्वबिद्यालयले दिने तलवबाट आफ्नो जिविका चलाउनुपर्ने यी प्राध्यापकले आफ्नो बचत काटेर भूकम्पपिडीतका लागि झण्डै १८ लाख रुपैयाँ प्रदान गरे ।
‘बर्षमा केही महिना अनुसन्धानका लागि नेपाल पनि बस्छु, तीन महिनाको तलव भयो भने मलाई ७-८ महिना चीनमा जीविका चलाउन पुगिहाल्छ’- झा ले भने-‘त्यही हिसाव निकालेर साढे ९ महिनाको तलव भूकम्प पिडीतलाई दिएको हुँ ।’
नेपालमा भूकम्प गएपछि उनी कार्यरत चिनियाँ बिश्वबिद्यालयमा सहकर्मीहरुले राजीवलाई भेटेर नेपालप्रति सहानुभूति जनाए । उनले यही मौकामा नेपालका लागि केही गर्न आफ्ना सहकर्मीलाई उत्प्रेरित गरे ।
भूकम्पपछि त्रिपालमा बस्न विवस दाजुभाइले शुद्ध पिउने पानीको अभावमा ज्यान गुमाउनुपर्ला भन्ने डर थियो राजिवलाई । त्यसैले उनले बिश्वबिद्यालय नेतृत्व र सहकर्मीवीच ठूलो स्केलका पानी सुद्धिकरण मेसिन पठाउने योजना सुनाए । जसमा सवै सहमत भए ।
उनकै पहलमा एक साताभित्रै नेपालमा दुईवटा ठूलो आकारका पानी शुद्धिकरण मेसिन आइपुगे । साथमा बिश्वबिद्यालयका केही इन्जिनियर पनि मेसिन जडान गर्न आए ।
दिनमा चार हजार लिटर पानी सुद्धिकरण गर्ने क्षमता भएका यी दुई मेसिनमध्ये एउटा भक्तपुरमा र एउटा ललितपुरमा जडान भएको झाले जानकारी दिए ।
‘यस्तो बिषम परिस्थीतिमा मजस्तो प्राध्यापकले गर्न सक्ने धेरै ठाउँ थिएन’ १७ बर्षदेखि चीनमा बस्दै आएका झाले टेलिफोनमा अनलाइनखबरसँग भने- ‘नेपालका भूकम्पका तस्वीर र समाचार हेर्दा मन थाम्न सकिन, त्यसपछि बिश्वबिद्यालयसँग मिलेर पानी शुद्धिकरण गर्ने मेसिन प्रदान गर्ने तारतम्य मिलाएँ ।’