१३ जेठ, काठमाडौ । भुकम्प पीडितको लागि राहत वितरण गर्न भन्दै समाज कल्याण परिषदले खरिद गरेको राहत सामग्री गुणस्तरहिन पाईएपछि बााणिज्य विभागको टोलीले तत्कालको लागि वितरणमा रोक लगाउँदै गोदममा शिलबन्दी गरेको छ ।
बुधबार विभागले अनुगमन गर्दा परिषदले खरिद गरेको सम्पूर्ण चामलमा उत्पादक, उत्पादमिति, ब्याच नम्बर, उपभोग्य मिति, मुल्य केही पनि उल्लेख नपाईएको अनुगमनकर्ताहरुले बताए ।
कालो बोरामा प्याक गरेर राखिएको चामल खोलेर हेर्दा खुल्ला आखाँले समेत कम गुणस्तरको भएको पाईएको उनीहरुले बताए । त्यस्तै परिषदले खरिद गरेको त्रिपाल समेत पातलो छ्याङछ्याङे, पानी समेत छेक्न नसक्ने खालको रहेको छ । विभागको टोलीले ती सामग्री भण्डारण गरिएको भृकुटी मण्डप स्थित गोदमा शिलबन्दी गरेको छ ।
भुकम्प पीडितको लागि सहयोग गर्न समाज कल्याण परिषदको उपकार कोषमा रहेको करिब २ करोड ९० लाख रुपैया कमिसनको लोभमा राहत कोषमा नदिई आफै राहत सामान खरिद गर्ने निर्णय गरेको भन्दै कर्मचारीहरुले नै यसअघि अख्तियार दुरुपयोग अनुसन्धान आयोगमा उजुरी हालिसकेका छन । ।
सो रकमले त्रिपाल, चामल, दाल, रुमाल, साबुन र नुन खरिद गरि राहत वितरण गर्न परिषदको बोर्डबाट स्विकृत गराई तत्काल सामान खरिद गर्न आर्थिक प्रशासन नियमावलीको खरिद सम्बन्धी नियम नै संसोधन गराई २४ घण्टाभित्र खरिद गर्नसक्ने ब्यवस्था गरिएको थियो ।
