देशका विभिन्न भूभागमा वैशाख १२ गतेपछि २४ लाख बराबरको सामाग्री वितरण गरिसकेको ‘आशाको ज्योती नेपाल’ नामक संस्थाले जानकारी दिएको छ । निर्देशक तथा कलाकार आकाश अधिकारी अध्यक्ष रहेको यो संस्थाको तर्फबाट आज पत्रकार सम्मेलनको आयोजना गर्दै यो कुराको जानकारी गराइएको हो ।
वि.सं २०६८ सालमा स्थापित यो संस्थाले वैशाख १२ गते आएको भुकम्पपछि ललितपुरको खोकना, काभे्रपलाञ्चोकको देउपुर, धादिङको तर्सपु र थाक्रे, लमजुङको वेशिसहर नगरपालिका १४ र बाग्लुङपानी गाविस, सिन्धुपाल्चोकको जरायटार गाविस र काठमाण्डुको रामकोटमा राहत सामाग्री वितरण गरिसकेको छ ।
यो संस्थाले हालसम्म २१ हजार किलो चामल, ५ सय किलो दाल, ५ सय ६० थान त्रिपाल, डेढ सय मिटर म्याटे्रक्स, १ सय ५० थान गुन्द्री, १० बोरा आयोडिनयुक्त नुन वितरण गरिसकेको छ ।
अब, करिब १ सय २२ थान टेन्ट, २ सय थान ब्ल्याङ्केट, ३ सय थान प्लाष्टिक प्याड वितरण गर्ने तयारी गरिएको पत्रकार सम्मेलनमा जानकारी गराइयो । यो राहत सामाग्रीलाई एक समिती गठन गरी वितरण गर्ने तयारी गरिएको छ । यी सामाग्रीहरु चाइनाको पोस्सिबल फिल्म प्रोडक्शनबाट द स्काइ मुभिज प्रालीको पहलमा नेपाल भित्राइएको छ ।
रेखाको पत्रकारलाई सहयोग
‘आशाको ज्योती नेपाल’ नामक संस्थाको पत्रकार सम्मेलन लगतै नायिका रेखा थापाले स्थापना गरेको ‘रेखा थापा फाउन्डेशन’को तर्फबाट भुकम्पबाट प्रभावित ३ जना चलचित्र पत्रकारहरुलाई प्रती व्यक्ति ३० हजार सहयोग गरिएको थियो । रेखा अमेरिका रहेकाले फाउन्डेशनका महासचिव सविर श्रेष्ठले पत्रकारहरु विजयरत्न तुलाधर, कुवेर गिरी र शारदा थापालाई सहयोग नगद हस्तान्तरण गरे । यसअघि पत्रकार डीवी शाहलाई पनि ३० हजार नगद सहयोग गरिएको थियो ।