१५ असार, काठमाडौं । नेपाली समाजमा एउटा आहान छ, भाङ्ग्राको टोपीमा गुहेँलीको फूल ! तस्वीरमा देखिएका एमाओवादीका तीन नेताको तस्वीरले यही आहानको झल्को दिन्छ ।
नेताहरुले जुनसुकै अवसरमा पनि महंगो सयपत्री फूलको माला लगाउनै पर्ने संस्कार नेपाली राजनीतिमा मौलाएको छ । मंगलबार अखिल क्रान्तिकारीले आयोजना गरेको रोपाईँमा समेत नेताहरुले यसै गरी मालाको प्रयोग गरे ।
राष्ट्रिय धान दिवसका अवसरमा मंगलबार काठमाडौंको सुन्दरीजलमा एमाओवादी महासचिव कृष्णबहादुर महरा, देवेन्द्र पौडेल लगायत रोपाईंमा सहभागी भएका थिए ।
अखिल क्रान्तिकारीको आयोजनामा भएको रोपाईंमा किसान नेता चित्रबहादुर श्रेष्ठ, एमाओवादीका नेता देवेन्द्र पौडेल, क्रान्तिकारीका अध्यक्ष रमेश मल्ललगायतको सहभागिता थियो ।
स्थानीय किसानको खेतमा सम्पन्न उक्त रोपाईंमा १ सय ५० जनाको सहभागिता रहेको अखिल क्रान्तिकारीले जानकारी दिएको छ ।
तर, माला लगाएरै भए पनि एमाओवादी नेताहरु हिलोमा चाँहि पसे । गृहमन्त्री वामदेव गौतम जसरी डीलबाट भाषण गरेर फर्केनन् ।
बाँकेमा एनजीओ र सहकारीको धान दिवस
अनलाइनखबरकर्मी आरपी सुवेदीका अनुसार बाँकेमा टिटिहिरिया गाविस र हेफर ईन्टरनेशनलको सहयोगमा दिपलगन सामाजिक उद्यमी महिला सहकारी संस्था लिमिटेडको आयोजनामा औपचारिक कार्यक्रम आयोजना गरी धान रोपेर दिवस मनाइएको छ ।
जिल्ला कृषि कार्यालय बाँकेको समन्वयमा चिसापानीमा पनि राष्ट्रिय धान दिवस मनाइएको छ ।
बाँकेमा ३६ हजार ५ सय हेक्टर जमिनमा धानखेती हुने गरेकामा हालसम्म ४ प्रतिशत मात्र रोपाईं भएको प्रमुख जिल्ला कृषि अधिकृत राजेन्द्र प्रधानले जानकारी दिए ।