केही महिना अगाडि अमेरिका उडेका निर्देशक श्याम भट्टराइले अब त्यही नै चलचित्र निर्देशन गर्ने भएका छन् । उनले अमेरिकामा रहेका एनआरएनहरुको कथामा बन्न लागेको चलचित्रको निर्देशन गर्न लागेको बताए ।
चलचित्र नेपाल विश्व सहयोग संघको तत्वावधानमा निर्माण हुनेछ । अमेरिकाको सनफ्रान्सिसकोमै बसिरहेका पि्रन्स युवराज कार्की र सुजित सिंहको लगानीमा चलचित्र निर्माण हुन लागेको हो ।
श्यामका अनुसार नेपालबाट गई अमेरिकामा रहेका कलाकारहरुले चलचित्रमा अभिनय गर्नेछन् । नाम तय नभैसकेको यो चलचित्रमा अमेरिकामा नेपालीले पाएका सफलता र असफलताको कथालाई उठाइनेछ ।
नेपालीका लागि यो चलचित्र अमेरिका हेर्ने ऐना हुने श्यामको दाबी छ । दशैपछि छायांकनमा जान लागेको यो चलचित्रमा सामिप्यराज तिमिल्सिनाको पटकथा, अर्जुन पोख्रेलको संगीत रहने पक्का भएको छ ।
नेपाल टेलिभिजनबाट प्रसारण भएका टेलिसिरियल ‘गहना’, ‘जानकी’, ‘दुई थोपा आँशु’को सफल निर्देशन पश्चात ठूलो पर्दाको चलचित्र निर्देशन थालेका श्यामले यसअघि ‘मर्यादा’, ‘मौसम’ र ‘लंका’ ‘च्यालेन्ज’ निर्देशन गरिसकेका छन् । श्यामले यसपछि अमेरिकामा नै रहेका कृष्ण खत्री, मनोज सिंह र यादव पौडेलको लगानीमा बन्ने अर्को चलचित्र पनि निर्देशनको तयारी गरिहेको बताए ।