२२ असार,काठमाडौं । संविधानसभामा संविधानको प्रारम्भिक मस्यौदामाथि छलफल गर्ने क्रममा सभासदहरुले प्रत्यक्ष निर्वाचित सभासदले मात्र प्रधानमन्त्री हुनुपर्ने प्राबधान राख्न दबाब दिएका छन् ।
संविधानसभाको मंगलवारको बैठकमा बोल्दै एमाले सभासद यज्ञराज सुनुवारले नेताहरुले समानुपातिकमा बसेर प्रधानमन्त्री बन्ने योजना अनुसार संविधानमा समानुपातिकबाट आएको व्यक्ति पनि प्रधानमन्त्री बन्न सक्ने प्राबधान राखेको आरोप लगाए ।
सुनुवारले भने- ‘प्रत्यक्ष निर्वाचित व्यक्तिमात्रै प्रधानमन्त्री बन्ने भनिएको थियो तर मस्यौदामा हटाइएछ । नेताहरु चुनावमा जान डराएर समानुपातिकमै सुरक्षित बस्ने र प्रधानमन्त्री हुने खेल खेलेको आशंका भयो ।’
एमालेकै अर्का सभासद पार्वत गुरुङले पनि प्रत्यक्ष निर्वाचित व्यक्तिमात्र प्रधानमन्त्री बन्ने व्यवस्था नगरिए राजनीतिमा विकृति आउने बताए । गुरुङले भने- ‘प्रत्यक्ष निर्वाचित प्रधानमन्त्री स्वीकार गरिएन, अहिले आएर प्रत्यक्ष निर्वाचित व्यक्ति प्रधानमन्त्री हुनुपर्ने कुरा पनि स्वीकार नहुने ठिक होइन ।’
सभासद रामकुमार सुब्बाले पनि प्रत्यक्ष निर्वाचित व्यक्ति प्रधानमन्त्री हुने व्यवस्था संविधानमा उल्लेख हुनुपर्ने बताए । सुब्बाले भने, ‘प्रत्यक्ष निर्वाचित कार्यकारी प्रमुख हुनुपर्ने त्यसबाट पछि हट्ने काम भएको छ ।’
आदिवासी जनजाति सभासदहरुले नयाँ संविधानमा जनजाति आयोग गठन हुनुपर्ने माग समेत गरेका छन् । सभासद गोकुल घर्तिमगरले भने-३८ प्रतिशत आदिवासी जनजातिको उत्थानका लागि आयोग संविधानमै उल्लेख हुनुपर्छ ।
सभासदहरु सुनुवार, गुरुङ, सुब्बा, घर्ती लगायतले आदिवासी जनजाति आयोग हुनुपर्ने धारणा राखे ।
