५ साउन, काठमाडौं । नयाँ संविधानको पहिलो मस्यौदामा सुझाव संकलन गर्न बसन्तपुर क्षेत्रमा कार्यक्रम आयोजना गरिएको थियो । आफूलाई प्रजातन्त्रवादी बताउने राप्रपा नेपालका नेता कार्यकर्ताले त्यहाँ ताण्डव प्रदर्शन गरे ।
सभासद नविन्द्रराज जोशी, राधेश्याम अधिकारी लगायत मस्यौदा लिएर सुझाव लिन तयार थिए । जनताको पनि उलेख्य सहभागिता थियो ।
त्यही बेला एक हुल मानिस राप्रपा नेपालको झण्डा बोकेर आए । सुरुमा प्रहरीले रोकेको थियो । तर, उनीहरु कार्यक्रम हलमा प्रवेश गरे ।
कार्यक्रम सुरु गर्दै सभासद जोशीले बोल्न मात्र के सुरु गरेका थिए, राप्रपा नेपालका कार्यकर्ताले ‘हिन्दु राष्ट्र कायम गर’ माग गर्दै नाराबाजी गरे ।
नाराबाजीका बीच राप्रपा नेपालका एक कार्यकर्ताले प्लास्टिकको कुर्सी उचालेर हान्न खोजे । स्थितिलाई नियन्त्रणमा लिन प्रहरीले लाठीचार्ज गर्नु पर्यो र केही बल कार्यक्रम हल तनावग्रस्त भयो ।
कार्यक्रममा सहभागीहरुले पनि हिन्दु राष्ट्र वा धार्मिक स्वतन्त्रताकै पक्षमा सुझाव दिँदै आएको भए पनि राप्रपा नेपालका कार्यकर्ताले हिन्दु धर्मको नाम लिएर ‘मण्डले’ व्यवहार प्रदर्शन गरे ।
आन्दोलनकारी र प्रहरीबीच झडपसँगै राप्रपा नेपालका कार्यकर्ताले सभासदलाई कुर्सी हान्ने प्रयास गरे । सभासदलाई प्रहार गर्न खोज्ने युवालाई पक्राउ गर्ने र बचाउने प्रयासमा केहीबेर छिनाझप्टी नै चल्यो । युवकको टिसर्ट च्यातियो । अन्ततः प्रहरी उनलाई नियन्त्रणमा लिन सफल भयो ।
राप्रपा नेपालका कार्यकर्ताले विरोधका नाममा वितण्डता मच्चाएको भन्दै कार्यक्रममा सहभागी महिला तथा युवाले आक्रोश पोखेका थिए ।
तस्वीरः प्रवीण महर्जन
