उमेर छिप्पिएको जंगली राँगो समूहबाट एक्लिने बित्तिकै भोकाएका सिंहहरु सजिलै आहारा बनाउन सकिने निधो गरी एकसाथ धावा बोले । पाँचवटा शक्तिशाली सिकारीको त्यो आक्रमण थेग्नु र जिउँदै उम्किनु सायद असम्भव थियो । तर त्यो साहसी भैँसीले हिम्मत हारेन र शत्रुसँग आत्मसमर्पण गरेन । अन्ततः लडाइँ जित्यो, आफ्नो पिठ्युँमा चढिसकेका सिंहलाई झट्कारेर भुइँमा झार्यो अनि विजयी मुद्रामा पानीमा कुँद्यो ।
दक्षिण अफ्रिकाको लन्डोलिजी गेम रिजर्भमा भएको पाँचवटा सिंह र एउटा राँगोबीचको भयानक युद्धको दृश्य हो यो । फोटोग्राफर प्राइभेट गाइडको रुपमा कार्यरत बाइरोन सेराओले यो दृश्य खिचेका हुन् ।
‘बिहान झण्डै नौ बजेको थियो । निकै शितल र सुन्दर बिहानी थियो । सिंहहरुले भैँसीको समूहलाई तितरवितर पारे र बुढो राँगोलाई एक्लाउन सफल भए’, फोटोग्राफर त्यो क्षणको सनसनीपूर्ण ब्याख्या गर्छन् ।
सिंहहरुले उसमाथि आक्रमण गरे । उसको पिठ्युँमा चढे, उसलाई ढलाउनका लागि धेरैपटक खुट्टामा समेत आक्रमण गरे, तर उसले हारेन । राँगोले जबरजस्ती गर्यो ।
आफ्नो पिठ्युमा एउटा सिंह चढेकै थियो । घेरिरहेका अन्य सिंहलाई सिङ देखाएर तर्साउँदै फुत्त नजिकैको नदिमा पस्यो । आफु ढाडमा चढिरहेको अवस्थामा राँगो नदिको गहिराइतर्फ जान थालेपछि ढाडमा चढेको सिंह पनि डरायो अनि राँगोको ढाड छाडेर भाग्यो ।
केही बेरपछि उक्त साहसी भैँसीले आफ्नो बथान फेला पार्यो । ऊ सामान्य घाइते बनेको छ ।