विश्वको सबैभन्दा ठूलो सर्च इन्जिन कम्पनी गुगलले आफ्नो सोसल नेटवर्क साइट गुगल प्लसलाई विदाई गर्ने तयारी गरिरहेको छ ।
फेसबुकलाई टक्कर दिने सोँचका साथ ४ वर्षअघि लन्च गरेको गुगल प्लसले सोँचे अनुसारको सफलता प्राप्त नगरेको मात्र होइन यसका कारण अन्य सुपरहिट सेवाहरुका प्रयोगकर्तालाई समेत हैरानी भएपछि गुगलले गुगल प्लसलाई अन्य सेवाहरुबाट अलग गरेर ‘निस्तेज पार्ने’ घोषणा गरेको हो ।
गुगलले पछिल्ला केही महिनायता गुगल प्लसको सबैभन्दा उपयोगी फिचर्सहरुलाई छुट्टाएर अर्को छुट्टै नयाँ सेवा तयार गर्ने काममा जुटिरहेको छ । गुगलले गुगलसँग सम्बन्धित सबै गतिविधिका लागि गुगल प्लसको आवश्यकता अन्त्य गर्ने दिशामा अघि बढिरहेको बताएको छ । अर्को महिनादेखि गुगल प्लसलाई छुट्टाउने घोषणाको कार्यान्वयन हुने र यसको सुरुवात यु ट्युबबाट गरिने गुगलका उपाध्यक्ष ब्राडली होरोविजले जनाएका छन् ।
गुगलले सोमबार गुगल प्लसलाई अलग बनाउने लगायतको विषयमा केही महत्वपूर्ण घोषणा गरेको छ । गुगलका अनुसार अबका दिनमा गुगल प्लसलाई दुइ नितान्त भिन्न उत्पादनहरु, भिडियो स्टि्रम्स तथा तस्वीरमा बदलिनेछ ।
अहिलेसम्म गुगलका कतिपय सेवा उपयोग जस्तै युट्युब भिडियोमा टिप्पणी गर्ने लगायतका लागि गुगल प्लस प्रोफाइल हुनु आवश्यक छ । तर भविष्यमा गुगलले गुगल प्लसलाई आफ्ना सबै अन्य सेवाबाट अलग गर्ने घोषणा गरेको छ । यसको अर्थ गुगलले आफ्नो फ्लप सन्तानको रुपमा रहेको गुगल प्लसलाई विस्तारै बन्द गर्नेछ ।
