१४ साउन, काठमाडौं । प्रि सिजन टुरका क्रममा चीनमा रहेको रियल मड्रिडले एसी मिलानलाई पराजित गरेको छ । बिहीबार भएको खेलमा रियल मड्रिडले इटालियन महारथी एसी मिलानलाई सडन डेथमा १०-९ ले पराजित गरेको हो ।
सांघाई स्टेडियममा भएको खेलको निर्धारित समयको खेल गालरहित बराबरीमा सकिएको थियो । रियलका स्टार स्ट्राइकर रोनाल्डोलाई ७१ औं मिनेटमा डेनिस चेरिशेवले रिप्लेस गरेका थिए ।
निर्धारित समयको खेल गोलरहित बराबरीमा सकिएपछि पेनाल्टी सुट आउटबाट निर्णय लिइयो । एसी मिलानका कार्लोस बाकाको प्रहार बारमा लगेर बाहिरियो भने रियल मड्रिडका टोनी क्रुजको प्रहार एसी मिलानका १६ वर्षे गोलकिपर डोनोरोमाले रोकपछि ४-४ भयो ।
सडन डेथमा दुबै टोलीका खेलाडीहरुले लगातार गोल गरे । ११ पेनाल्टीमा रियलका गोलरक्षक कासियाले गोल गरे भने एसीमिलानका डोनोरोमाको प्रहार रोक्दै रियल मड्रिडलाई जित दिलाए ।
