रामप्रसाद ढुंगेल
यूएई । २०४६ सालका प्रजातान्त्रिक आन्दोलनमा सहभागी झापा शनिश्चरेका तिलक गजुरेल संयुक्त अरब इमिरेट्स (यूएई)मा पसिना बगाइरहेका छन् । २०४६ सालको प्रजातान्त्रिक आन्दोलनमा सहभागी गजुरेलका थुप्रै सहयात्रीहरु सभासददेखि मन्त्रीसमेत भए ।
आफ्ना सहयात्रीहरु नीति निर्माण तहमा पुगेर मुलुकको नीति निर्माणमा ब्यस्त रहँदा गजुरेल भने आफ्नो जीविकोपार्जनका लागि अबुधावीमा दैनिक १२ घण्टा श्रम गरिरहेका छन् । प्रजातन्त्र पुनर्वहालीको क्रममा २०४६ सालमा कांग्रेको विद्यार्थी नेता भइसकेका थिए । उनी नेविसंघ झापाको सचिव भएको अवस्थामा समय जेल जीवनसमेत ब्यतित गरे ।
उनी झापाका प्रजातान्त्रिक आन्दोलनका अग्रणी मात्र थिएनन्, लामो समय प्राध्यापन पेशासमेत अपनाए । उनैले शिक्षा दिएका हजारौं विद्यार्थी यूरोप र अमेरिका पुगे पनि गजुरेल भने यूएईमा हाड घोटिरहेछन् ।
वैदेशिक रोजगारमा गएका थुप्रै नेपालीहरु विभिन्न संघ संगठनमा आवद्ध भई सक्रिय देखिन्छन् तर गजुरेल सामाजिक सेवामा समर्पित भएर पनि चर्चामा आउनसमेत चाहँदैनन् ।
भूकम्पपीडितलाई सहयोग गर्न आफ्नै तलब पठाए
उमेरले ४५ वर्ष नाघेका गजुरेलले वैशाखमा नेपालमा गएको विनासकारी भूकम्पका पीडितहरुलाई सहयोगार्थ केही रकम जुटाएर पठाए । आफूसँगै काम गर्ने साथीहरुसँगबाट एक दिनको तलब जुटाउने प्रयास गरे पनि भने जस्तो पैसा नजुटेपछि आफैले कमाइ गरी जुटाएको ६२ हजार रुपैयाँ पठाए भने विभिन्न ठाउँबाट गरी १ लाख ५० हजार जुटाएर सहयोग पठाए ।
राहत वितरणका लागि पनि गजुरेल आफै नेपाल आउन चाहे पनि आउन नसकेपछि छोरा र छोराकै सहकर्मीहरुलाई राहत वितरणको जिम्मा दिए । उनका छोरा निरज र निरजका साथी सुपराज बान्तवा राईले रामेछापको भुजी गाउँमा राहत बाँडेका थिए ।
९० प्रतिशत घर भत्किएको भुजीगाउँमा अधिकांश दलितवस्ती रहेको अधिकांश क्रिश्चियन धर्मावलम्बीहरु रहेका धार्मिक सहिष्णुताकै लागि भुजी गाउँ राहत वितरणको रोजाइमा परेको गजुरेलले बताए ।
भूकम्पपीडितको लागि आर्थिक सहयोग जुटाउने अभियानमा हल्यान्डमा कार्यरत उनका पूर्व सहकर्मी प्रकाश गिरी र हल्यान्ड नागरिक रम्स रोतीले पनि साथ दिएका थिए भने कुबेतमा रहेका सुमित चिमोरिया, यूएईबाट रविन खनाल, आरपी सहयात्री लगायतले राम्रो सहयोग गरेको भन्दै गजुरेलले बताए । स्नातकसम्मको अध्ययन गरेका गजुरेलले जीवनका २ दशक नेपालमै शिक्षण पेशा अपनाएका थिए ।
गुरुको सम्मान गर्छन् गजुरेल
कुरामा भन्दा पनि कर्ममा विश्वास गर्ने गजुरेल गुरुको सम्मान गर्न चाहन्छन् । त्यसैले हरेक वर्षको गुरु पूणिर्मामा गुरु भेट्न परदेशबाटै आउने गरेका थिए ।
परदेशमा रहे पनि विगत तीन वटा गुरुपूणिर्मामा नेपालपुगी झापाकै शनिश्चरे मन्दिरमा एक कार्यक्रम गरी आफूलाई पढाएका गुरुहरुलाई सम्मान गर्दै आएका थिए ।
तर यसपाली स्वेदेश फर्किन नसके पनि आफ्नी श्रीमती मीना, छोरा निरज र छोरी निकिताले आफ्ना गुरुहरुलाई भेला गराई सम्मान गरेकोमा गजुरेल फुरुङ्ग भए ।
काममा विश्वास गर्ने, आफ्ना अग्रजहरुको सम्मान गर्ने, देशको अवस्थाको विषयमा परदेशबाटै चिन्तनमनन् गर्ने, परेको बेलामा सहयोगी हातहरु अघि बढाउने गजुरेलजस्ता पौरखी हातहरुलाई मुलुकको प्रजातन्त्रको हिमायती भन्नेहरुले सम्मान गर्न जरुरी छ । परिवर्तनका सारथी यिनै श्रमजीवी हातहरुको सम्मान गर्ने संविधान मुलुकले पाएमा मात्रै गजुरेलजस्ता श्रमजीवीहरुको सम्मान हुनेछ ।