१९ साउन, काठमाडौं । नेपाल आयल निगमले हवाई इन्धनको मूल्य घटाएपछि आन्तरिक वायुसेवा कम्पनीले औषतमा ११.०८ प्रतिशत हवाई भाडा घटाएका छन् । वायुसेवा कम्पनीले साउन २२ गतेदेखि लागू हुने गरी हवाई भाडा घटाएका हुन् ।
वायुसेवा सञ्चालक संघको मंगलबार बसेको बैठकले हवाई भाडा घटाउने निर्णय गरेको हो । काठमाडौंबाट सबैभन्दा नजिकको गन्तव्य सिमरामा प्रतियात्रु १६८ रुपैयाँ ७५ पैसा घटाइएको छ भने सबैभन्दा टाढाको गन्तव्य धनगढीमा ५८१ रुपैयाँ २५ पैसा घटाइएको छ ।
यसैगरी, काठमाडौंबाट विहानमा हुँदै आएको माउन्टेन फ्लाइटमा ५६२ रुपैयाा ५० पैसा घटाइएको छ ।
निगमले आइतबार हवाइ इन्धन आन्तरिक उडानतर्फ प्रतिलिटर १५ रुपैयाँ घटाएर ११८ रुपैयाँ कायम गरेको छ । ‘निगमले हवाइ इन्धन घटाएपछि हामीले पनि यात्रुलाई इन्धनबापत लिइँदै आएको शुल्क कटौती गर्ने निर्णय गरेका हौं’ संघका प्रवक्ता घनश्याम आचार्यले अनलाइनखबरसँग भने ।
यसअघि निगमले हवाई इन्धनको मूल्य घटाउँदा पनि आन्तरिक वायुसेवा कम्पनीले हवाई भाडा घटाएका थिए । संघले प्रतियात्रु प्रतिमिनेटका दरले गन्तव्यका आधारमा भाडा घटबढ गर्ने प्रवक्ता आचार्यले बताए ।
कहाँ कति घट्यो ?
देखि | सम्म | घटेको शुल्क |
---|---|---|
काठमाडौं | पोखरा | रु. २५३.१३ |
काठमाडौं | धनगढी | रु. ५८१.२५ |
काठमाडौं | विराटनगर | रु. ३४६.८८ |
काठमाडौं | भरतपुर | रु. १९६.८८ |
काठमाडौं | भद्रपुर | रु. ४१२.५० |
काठमाडौं | भैरहवा | रु. ३०९.३८ |
काठमाडौं | जनकपुर | रु. २२५ |
काठमाडौं | सिमरा | रु. १६८.७५ |
काठमाडौं | तुम्लिङटार | रु. ३०९.३८ |
विराटनगर | तुम्लिङटार | रु. १८७.५० |