१९ साउन, काठमाडौं । प्रमुख प्रतिपक्षी एकीकृत नेकपा माओवादीले मंगलबार दोस्रो दिन पनि व्यवस्थापिका संसद बैठक बहिष्कार गरेको छ । सोमबारको संसद बैठक पनि एमाओवादीले बहिस्कार गरेको थियो ।
मंगलबार सभामुख सुवास नेम्वाङले ‘विनियोजन विधेयक २०७२ माथि विचार गरियोस्’ भन्ने प्रस्ताव पेस गर्नेबित्तिकै एमाओवादी सभासद प्रभु साहले आफूहरुका माग सम्वोधन नगरिएकाले बैठक बहिस्कार गर्ने निर्णय यथावत रहेको जानकारी गराए ।
सत्तारुढ दलको महाधिवेशनलाई केन्द्रित गरेर गरेर बजेट ल्याइएको, प्रभावशाली नेताको निर्वाचन क्षेत्रमा दर्जनौं योजना पारिएको र अरु निर्बाचन क्षेत्रलाई बेवास्ता गरिएको उनले आरोप लगाए । यसैगरी शान्ति सम्झौतासँग जोडिएका विषयलाई सम्वोधन गर्न सरकार गम्भीर नभएको, युवालाई रोजगारी दिनेतर्फ पहल नभएको र भूकम्प र बाढी पहिरो पीडितलाई राहत तथा पुनःस्थापनामा बेवास्ता गरिएकाले संसद बैठक बहिस्कार गर्ने साहले बताएपछि एमाओवादी सभासदहरु बाहिरिएका थिए ।
सभामुख सुवास नेम्वाङले प्रमुख प्रतिपक्षी दलले बैठक बहिष्कार गरेको अवस्थामा सदन नचल्ने प्रचलन भएको भन्दै सरकारको ध्यानाकर्षण गराए । व्यवस्थापिका-संसदको अर्को बैठक बुधबार ३ बजे बस्नेछ ।
