‘वैज्ञानिक भाडा पद्धतिअनुसार इन्धनको मूल्यमात्र नभई सवारी साधनमा प्रयोग हुने अन्य चीजबीजको बजार भाउलाई पनि आधार मानेर भाडामा समायोजन गर्ने व्यवस्था भएकाले अहिलेलाई भाडा घट्दैन,’ यातायात विभागका प्रवक्ता मुक्ति केसीले  भने ।

नेपाल आयल निगमले आइतबार राति १२ बजेदेखि डिजेल, मट्टीतेल र पेट्रोलमा दुई रुपैयाँ ५० पैसा र खाना पकाउने ग्यासमा ३५ रूपैयाँ घटाएको थियो । घटाएपछि पेट्रोलको मूल्य प्रतिलिटर १०६ रुपैयाँ ५० पैसा कायम भएको छ भने डिजेल र मट्टीतेलको ८४ रुपैयाँ ५० पैसा कायम भएको थियो । भाउ घटेपछि खाना पकाउने ग्यासको मूल्य एक हजार ४३५ रूपैयाँ कायम भएको छ ।

निगमले हवाई इन्धनको मूल्य पनि घटाएको थियो । हवाई इन्धन आन्तरिक उडानतर्फ प्रतिलिटर १५ रुपैयाँ घटाएर ११८ रुपैयाँ कायम गरेको र हवाई इन्धन अन्तर्राष्ट्रियतर्फ प्रतिकिलोलिटर ७५ डलर घटाएको थियो । हवाई इन्धनको भाउ घटेपछि नेपाल हवाई सङ्घले मङ्गलबार हवाई यातायातको भाडा घटाएको थियो ।

यससँगै सार्वजनिक यातायातमा भाडा घटाउन सरकारसँग माग गरिएको नेपाल विद्यार्थी सङ्घका प्रवक्ता यूपी लामिछानेले जानकारी दिए ।

‘सरकारले २०७१ पुस ९ र माघ २६ गते सार्वजनिक सवारी साधनमा घटाएको भाडादर पनि अझ लागू भएको छैन, अहिले पनि विद्यार्थी सङ्गठनका तर्फबाट संयुक्त रुपमा इन्धनको भाउ घटेअनुसार भाडा घटाउन माग गरेका छौँ, कार्यान्वयन भएन भने आन्दोलनका कार्यक्रम सार्वजनिक गर्ने सन्दर्भमा छलफल गरिरहेका छौँ,’ उनले भने ।

यात्रुले भने सार्वजनिक सवारी साधनको भाडा घट्नुपर्ने माग गर्न थालेका छन् । उपभोक्ता मञ्चका अध्यक्ष हरेन्द्रबहादुर श्रेष्ठ यसअघिदेखि निगमले घटाएको भाउ हिसाब गर्दा रु पाँच पुगिसके पनि भाडा नघटाउन विभाग र यातायात व्यवसायी मिलेको गुनासो गरे ।

‘इन्धनको भाउ बढ्दा त्यही दिन सवारी साधनले भाडा बढाउँछन्, घट्दा सरकारले निर्णय गरेको महिनौँ बित्दा पनि भाडा नघट्नु उपभोक्तामाथिको अन्याय हो, यस्तो क्रियाकलापका विरुद्ध नउत्रिएसम्म भाडा घट्दैन,’ उनले भने । रासस