निमुसंगम घर्ती
१९ भदौ, दाङ । २५ दिनदेखि बन्द रहदै आएको दाङको देउखुरी क्षेत्र दुई दिनका लागि खुलेको छ । बन्द आयोजक थरुहट/थारुवान संयुक्त संघर्ष समिति र देउखुरी उद्योग बाणिज्य संघ बिच भएको छलफलमा शनिबार र आईतबार देउखुरी क्षेत्र खुलाउने सहमति भएको हो ।
दुई दिनका लागि बिहान ५ बजेदेखि राति ८ बजे सम्म बजार, यातायात, उद्योग कलकारखानालाई सञ्चालन गर्न दिने संघर्ष समितिका संयोजक हिरालाल चौधरीले जानकारी दिए । अष्टमी र अटुवारी पर्वलाई मध्यनजर गर्दै दुई दिनको बन्द खुकुलो पारिएको चौधरीको भनाई छ । बन्द खुले सँगै देउखुरीका लमहि, भालुबाङ, सिसहनिया, गढवा लगाएतका बजारमा नागरिकहरुको भिड रहेको छ भने गाडीहरु पनि छोटो दुरीमा चलेका छन् । तर स्कुललाई भने सञ्चालन गर्न नदिने उनीहरुको चेतावनी छ ।
थरुहट स्वायक्त प्रदेशको माग गर्दै थारुहरुको जातिय संगठनले २५ दिन देखि दाङ बन्दको आहृवान गर्दै आएका छन् । तर त्यसको प्रभाव थारुहरुको बाहुल क्षेत्र देउखुरी बाहेक अन्यत्र परेको छैन् । कैलालीमा थरुहट र प्रहरी बिच हिंसात्मक झडप भएपछि दाङ पनि उच्च जोखिमको जिल्ला रहेको भन्दै स्थानिय प्रशासनले दंगाग्रस्त क्षेत्र घोषणा गरेपछि जिल्लाका घोराही र तुलसिपुरमा बजार र गाडि सञ्चालनमा आएका छन् ।
हुलहुज्जत, ५ जना भन्दा धेरै जमघट हुन नपाउने, नाराबाजी, सभा गर्न नपाउने भनि स्थानिय प्रशासनले सूचना जारी गरि दंगाग्रस्त क्षेत्र घोषणा गरेपछि घोराही र तुलसिपुर बजार निर्बाधरुपमा सञ्चालनमा आएका हुन् । स्थानिय प्रशासनले सुरक्षा व्यवस्था कडा पारे सँगै नागरिकहरुको दैनिक सहज भएको छ । तर देउखुरी क्षेत्र भने बन्दको मारमा पर्दै आएको छ ।
सम्बोधन हैन दमन गर्यो
थारु आन्दोलनमा होमिएको नेताहरुले आफुहरुको माग सम्बोधन गर्नुको साटो सरकारले सेना परिचालन गरेर दवाएको बताएका छन् ।
हाम्रो अधिकार दे भनेर भनिरहेका छौ तर सरकार दंगाग्रस्त क्षेत्र घोषणा र सेना परिचालन गरेर दमन गर्दै छ संघर्ष समितिका संयोजक तेजमान चौधरीले भने । जनतालाई दुख्ख दिने मनसाय हैन चौधरीले भने, सरकारको दमनकारी भुमिकाको जवाफ बन्द खोजेका हौ ।
दंगाग्रस्त क्षेत्र घोषणा फिर्ता र सेना व्यारेकमा नगए सम्म र आफुहरुको माग सम्बोधन नभए सम्म आमहडताल जारी रहने चौधरीको भनाई छ । संघिय प्रदेश बनाउदा चितवन देखि कन्चपुर सम्मको भागलाई थरुहट प्रदेश बनाउनु पर्ने माग गर्दै थारुहरुको जातीय संगठनले साउन २७ गते बन्द आहृवान गर्दै आएका छन् ।।
