गौतम श्रेष्ठ
२९ भदौ, रौतहट । संयुक्त लोकतान्त्रिक मधेसी मोर्चा रौतहटका कार्यकर्ताले गौरमा आज मुखमा कालो पटी बाँधेर प्रदर्शन गरेका छन् ।
मधेसी मोर्चासँग आबद्ध पाँच जना नेतालाई रौतहट प्रहरीले पक्राउ गरेको विरोधमा प्रदर्शन भएको हो । उनीहरुले प्रदर्शनलाई ‘जेल भरौं अभियान’ नाम दिएका छन् ।
आइतवार गौर ५ स्थित जिल्ला विकास समितिका पूर्व सभापति राजेन्द्र पटेलको घरमा बसिरहेको अवस्थामा प्रहरीले मोर्चाका पाँच नेतालाई पक्राउ गरेको थियो । सबै नेता कार्यकर्तालाई जेल हाल्नु पर्ने माग गर्दै प्रर्दशन गरिएको मोर्चाका संयोजक बाबुलाल साहले बताए ।
मुखमा कालोपटी बाँधेर अदालत अगाडीबाट निस्केका जुलुस अस्पताल, जिल्ला प्रहरी कार्यालय, विपी चोक, कविर चोक, शिक्षा कार्यालय हुँदै गौर ८ स्थित पोखरीमा पुगेर सम्पन्न भएको थियो ।
