१५ असोज, काठमाडौं । राष्ट्रिय लिग फुटबल सशस्त्र प्रहरीको एपीएफ क्लबले अर्को विभागीय टोली नेपाल प्रहरी क्लबलाई पराजित गरेको छ ।
सातदोबाटोस्थित एन्फा कम्प्लेक्सको खेल मैदानमा भएको खेलमा एपीएफले प्रहरीलाई ३–० गोलअन्तरले पराजित गरेको हो ।
एपिएफको जितमा टोपबहादुर विष्टले दुई गोल गरे भने गणेश लावतीले एक गोल थपे । विष्टले खेल सुरुआती नौ मिनेटमा एक गोल गर्दै खाता खोले । उनले हेमन गुरुङको पासलाई सदुपयोग गर्दै गोल गरेका थिए ।
पहिलो हाफसम्म १–० ले अगाडि रहेको एपिएफले खेलको दोस्रो हाफमा दुई गोल थप्यो । एपिएफका विष्टले खेलको ४७औँ मिनेटमा पुनः एक गोल थप्दै आर्मीको अग्रता दोब्बर बनाए ।
खेलको ७६औँ मिनेटमा एपिएफका अर्का खेलाडी लावतीले एक गोल थप्दै आर्मीका लागि तेस्रो गोल गरे । प्रहरीले खेलको निर्धारित समयसम्म गोल गर्न निकै प्रयासरत रहे तापनि अन्ततः हार बेहोर्न पर्यो ।
जितसँगै एपिएफ २० अङ्क जोड्दै लिगको चौथो स्थानमा उक्लिएको छ । पहिलो स्थानमा झापा फुटबल क्लब, दोस्रो थ्रिस्टार क्लब र तेस्रोमा विभागीय टोली त्रिभुवन आर्मी क्लब छन् । झापाको २४, थ्रिस्टारको २३ र आर्मीको २१ अङ्क छ । प्रहरी १२ अङ्कका साथ लिगको सातौँ स्थानमा छ । रासस
