१९ असोज, काठमाडौं । सरकारले गत वर्ष निःशुल्क औषधि खरिदका लागि छुट्याएको करोडौं रुपैयाँ रकमान्तर गरी निजी अस्पताललाई बाँडेको पाइएको छ । सरकारले निःशुल्क औषधि खरिदका लागि छुट्याएको १२ करोड ५० लाख रुपैयाँ रकमान्तर गरी धुलिखेल अस्पताललाई बाँडेको पाइएको राजधानी दैनिकमा खबर छ ।
स्वास्थ्य तथा जनसंख्या मन्त्रालय र अर्थ मन्त्रालयका उच्च अधिकारीहरुको मिलेमतोमा सो रकम रकमान्तर गरी धुलिखेल अस्पताललाई दिइएको हो । धुलिखेल अस्पतालले रकमान्तर गरी लगेको सो रकम केमा खर्च भयो र त्यसबाट कति नेपालीको सुविधा लिए भन्ने तथ्य कही कतै खुल्दैन ।
नेपाल सरकारबाट प्रत्येक वर्ष अनुदान पाउने सो अस्प्तालले सरकारलाई खर्च विवरणसमेत बुझाएको देखिँदैन ।
अनुदान पाउने जुनसुकै अस्पताल वा संस्थाले साउन मसान्तसम्म खर्च विवरण बुझाइसक्नुपर्छ । तर, डेढ महिना बितिसक्दा पनि मन्त्रालयमा अहिलेसम्म कुनै अस्पताल र संस्थाले विवरण बुझाएका छैनन् ।
