२३ असोज, काठमाडौं । नेकपा एमाले अध्यक्ष केपी ओलीले प्रधानमन्त्रीका लागि उमेद्वारी दर्ता गरेका छन् ।
संसद सचिवालयमा दर्ता गरिएको उमेद्वारीको प्रस्तावक एमाओवादी अध्यक्ष प्रचण्ड रहेका छन् भने समर्थकमा राप्रपा नेपालका अध्यक्ष कमल थापा रहेका छन् ।
व्यवस्थापिका संसदको भोलि आइतबार ११ बजेको बैठकमा मतदान हुनेछ । केपी ओलीसँग प्रधानमन्त्रीमा प्रतिस्पर्धाका लागि कांग्रेस सभापति सुशील कोइरालाले प्रतिस्पर्धा गर्ने भएका छन् ।
ओलीको समर्थनमा साना र ठूलासहित २५ दल रहेको एमाले नेताले बताएका छन् । यससँगै ओली मुलुकको ३८ औं प्रधानमन्त्री हुने पक्का भएको छ ।
एमालेका १८३, एमाओवादीका ८३ र राप्रपा नेपालका २५ सभासद छन् । तीन दलको कुल मत २९१ हुन्छ । ओलीलाई साना दलको पनि समर्थन छ ।
प्रधानमन्त्री बन्न ओलीलाई आवश्यक ३०० मत पुर्याउन तीन दलबाहेक थप ९ मतमात्रै चाहिन्छ । यसका लागि राप्रपासहितका दलहरुले सहमति जनाइसकेकाले ओलीको बहुमत निश्चित देखिएको छ ।
