सउल । अटिजम बालबालिकाहरुको हितमा काम गरेकी सबिता उप्रेती कोरियामा सम्मानित भएकी छिन् । विशेष स्कुल तथा पुनःस्थापना केन्द्र सञ्चालन गरी अटिजम बालबालिकाहरुलाई पुनर्जिवन दिएका कारण सबिता कोरियामा सम्मानित भएकी हुन् । अटिजम बालबालिका सहयोग अभियान कोरियाले आयोजना गरेको कार्यक्रममा कोरियाका नेपाली सङ्घ सस्थाहरुले संयुक्तरुपमा सबितालाई सम्मान गरेका हुन ।
‘अटिजम बालबालिका सहयोग अभियान- दक्षिण कोरियाले उप्रेतीलाई कोरियामा आमन्त्रण गरी एक समारोहकाबीच सम्मान गरेको हो । नेपाली समाजको प्रतिकुल अवस्थालाई चिर्दै अटिजम जस्तो बुझ्न र बुझाउन अत्यन्त जटिल र महत्व पूर्ण समस्याप्रति सबिता उप्रेतीले विशेष स्कुल तथा पुनर्स्थापना केन्द्र (एसएसडीअरसी) स्थापना गरी नेपाली समाजलाई पुर्याएको योगदानको उच्च मुल्यांकन गरी सम्मान गरिएको अभियानका संयोजक विक्रम सिंह ठकुरीले बताए ।
सम्मान ग्रहण गर्दै सबिताले कोरियाबासी नेपालीहरूको गुन नर्बिसिने बताइन् । सहयोग रकमलाई सही ठाउमा ईमान्दार पूर्वक स्रोत र साधनले भ्याएसम्म धेरै सङ्ख्यामा अटिजम बालबालिकाहरुलार्ई सेवा प्रदान गर्ने लक्ष्य रहेको सबिताले प्रतिबद्धता जनाइन् ।
संस्थाको नियमित आर्थिक सहयोगी र स्रोत नभएको कारण उल्लेखनीय सेवा पु-याउन नसकिरहेको सबिताको भनाई रहेको थियो । सोही समारोहमा सहयोग रकमसहित नेपाली बिद्यार्थी समाज दक्षिण कोरियाले पनि सम्मान गरेको थियो ।
यसैगरी कोरिया पुगेकी सबितालाई अक्षयकोष स्थापानामा आर्थिक सहयोग गर्दै एनआरएन कोरियाका नवनिर्वाचित पदाधिकारीहरूले सम्मान तथा सहयोग हस्तान्तरणको छुट्टै कार्यक्रमको आयोजना गरिएको थियो । सबिता उप्रेतीको सम्मानमा आयोजित उक्त कार्यक्रममा एनआरएन कोरिया, नेपाली सम्पर्क समिति, वुमन फर वुमन लगायत विभिन्न सङ्घ संस्था र सर्वसाधारण नेपालीहरूले सम्मान व्यक्त गरेका थिए ।
दुवै सम्मान कार्यक्रममा नेपाली राजदूतावासको श्रम सहचारी अनिल गुरुग, नवनिर्वाचित एनआरएनमोरिया आइसिसी केपी सिटौला र विनोद कुवर, एनआरएनए कोरिया अध्यक्ष राजु क्षेत्री, सोन्सिकको अध्यक्ष इन्दिरा तिवारी, वुमन फर वुमनकी अध्यक्ष मल्लिका थकाली, एनसीसीकी अन्जु केसी, मिडियाकर्मीहरु लगायत विभिन्न सङ्घ संस्थाको प्रतिनिधिहरूको उपस्थिति थियो ।
कार्यक्रममा कोरियाबासि नेपालीहरुबाट संकलित २३ लाख ६२ हजार ९ सय ३३ रुपैयाँ विशेष स्कुल तथा पुनर्स्थापना केन्द्रको अक्ष्यकोषका लागि संचालिका सबिता उप्रेतीलाई हस्तान्तरण गरएको थियो ।
सबिता उप्रेतीले आफ्नो व्यक्तिगत जीवनलाई टाढा राखेर विगत पाँच वर्षदेखि काठमान्डौको पुरानो सिनामंगल (पेप्सिकोला)स्थित विशेष स्कुल तथा पुनर्स्थापना केन्द्रको स्थापना गरी ४० जना अटिजम बालबालिकाहरुको सेवामा काम गर्दै आएकी छन् ।
