पुष्प दुलाल
३ मंसिर, काठमाडौं । भूकम्प, मधेस आन्दोलन र भारतीय नाकाबन्दीले बैंकहरुको नाफामा असर गरेको छ । व्यवसाय वृद्धिको तुलनामा बैंकहरुको नाफा बढ्न नसकेको तथ्यले त्यसको पुष्टि गर्छ । आर्थिक वर्ष ०७१ असोज मसान्तको भन्दा ०७२ असार मसान्तमा २० वाणिज्य बैंकहरुको नाफा १.९३ प्रतिशतले मात्रै बढेको छ ।
एक वर्षको अवधिमा बैंकहरुको नाफा ७३ करोड ३३ लाख ७५ हजार रुपैयाँले मात्रै बढेको बैंकहरूले प्रकाशित गरेको वित्तीय विवरणमा उल्लेख छ । ०७२ असोज मसान्तको वित्तीय विवरण सार्वजानिक गर्ने २० वाणिज्य बैंकहरुले ४ अर्ब ७७ करोड ५८ लाख ६० हजार रुपैयाँ नाफा कमाएको छन् । जबकी ०७१ असोज मसान्तमा यी बैंकहरुले ४ अर्ब ४ करोड २४ लाख ७५ हजार रुपैयाँ कमाएका थिए ।
०७२ असोज मसान्तसम्ममा २० वटा बैंकहरुले १० खर्ब ३१ अर्ब ६९ करोड ८२ लाख रुपैयाँ निक्षेप संकलन गरी ७ खर्ब ७६ अर्ब रुपैयाँ कर्जा प्रवाह गरेका छन् । ०७१ असोज मसान्तमा यी बैंकहरुले ८ खर्ब ६० अर्ब ६२ करोड १० लाख रुपैयाँ निक्षेप संकलन गरी ६ खर्ब ६८ अर्ब २८ करोड २६ लाख रुपैयाँ कर्जा प्रवाह गरेका थिए ।
बैंकहरुको नाफाको स्थिति (रु. हजारमा)
बैंक | २०७२ असोज | २०७१ असोज |
---|---|---|
नविल बैंक | ६५३५०७ | ५०४८५९ |
नेपाल बैंक | ४४४३६६ | २६९१९९ |
इनभेष्टमेन्ट बैंक | ४२३८३४ | ४९१३१८ |
एभरेष्ट बैंक | ३६३७०२ | ३९११३७ |
स्टान्डर्ड चार्टड | ३४५२४५ | ३४९७७२ |
ग्लोबल आइएमइ | ३१३५६५ | २२२७८५ |
कृषि विकास बैंक | २८८६८१ | २१५०५४ |
सानिमा बैंक | १७६८४४ | १३०९२५ |
सिद्धार्थ बैंक | १७२०३६ | १४४१५२ |
बैंक अफ काठमाण्डू | १६८७४८ | १६५८६७ |
सिटिजन बैंक | १४२७८० | ११०३४५ |
नेपाल बंगलादेश बैंक | १२४८९२ | ४६६३६ |
मेगा बैंक | ८४३४८ | १५१७८८ |
लुम्बीनी बैंक | १३४४२२ | १२१४३३ |
कुमारी बैंक | ४८६८० | ३४१६५५ |
नेपाल एसबिआइ बैंक | ३०२०७१ | २५६२१० |
सनराइज बैंक | ११७८०२ | ९५०२६ |
प्राइम बैंक | १६१६३७ | २२०५०० |
एनसीसी | १५५१४२ | १२३९५० |
एसबिआइ बैंक | ३०२०७१ | २५६२१० |
माछापुच्छ्रे बैंक | १७३१२४ | १९०३५५ |
कूल | ४७७५८६० | ४०४२४७५ |
देशभर ३० वटा वाणिज्य बैंक सञ्चालनमा रहेपनि बुधबारसम्ममा २० वटाले मात्रै पहिलो त्रैमासको अपरिस्कृत वित्तीय विवरण सार्वजानिक गरेका छन् । त्रैमास सकिएको ३५ दिनभित्र वित्तीय विवरण सार्वजानिक गर्नुपर्ने नियामक राष्ट्र बैंकको नियम छ । जसअनुसार मंसिर ५ गतेसम्ममा सबै बैंकहरुको वित्तीय विवरण सार्वजानिक हुनुपर्नेछ ।
यो असोज मसान्तसम्ममा २० बैंकहरुको कूल सम्पत्ति १२ खर्ब ९ अर्ब ८० करोड रुपैयाँ पुगेको छ । गत वर्षको असोजमा यी बैंकहरुको कूल सम्पत्ति १० खर्ब २० अर्ब ९६ करोड रुपैयाँ थियो ।
निक्षेपको तुलनामा कर्जाको वृद्धिदर कम भएकाले र बैंकिङ प्रणालीमा थुप्रिएको अत्यधिक लगानी योग्य रकम (अधिक तरलता) का कारण व्याजदर घटेपछि बैंकहरुको खुद व्याज आम्दानी खासै बढ्न नसक्दा बैंकहरुको नाफा पनि बढ्न नसकेको हो ।
०७१ असोजमा ८ अर्ब ५१ करोड ५१ लाख रुपैयाँ खुद व्याज आम्दानी गरेका २० बैंकले ०७२ असोज मसान्तमा ८ अर्ब ६३ करोड ६५ लाख रुपैयाँ खुद व्याज आम्दानी गरेका छन् ।
बैंकहरुको नाफा सन्तोषजनकरुमा नबढे पनि कुनैपनि बैंकको नाफा घटेको भने छैन । बैशाखको भूकम्पदेखि देश लगातार संकटबाट गुज्रिरहेकाले आर्थिक गतिविधि कम हुँदा पनि बैंकहरुको नाफा नघट्नु भने सकरात्मक पक्ष हो ।
तर, मधेस आन्दोलन र भारतीय नाकाबन्दीको असर पुस मसान्तको वित्तीय विवरणमा देखिने सानिमा बैंकका प्रमुख कार्यकारी अधिकृत भुवन दाहालले अनलाइनखबरलाई जानकारी दिए ।
‘यो त्रैमासमा मधेस आन्दोलन र भारतीय नाकाबन्दीको खासै ठूलो असर देखिएको छैन तर पुस मसान्त्को प्रतिवेदनमा भने उल्लेख्य असर देखिने छ ।’ दाहालले भने । अहिलेसम्म व्याज र कर्जा असूलीमा समस्या नदेखिएकाले पनि नाफामा ठूलो असर नपरेको उनले बताए ।
बैंकहरूको खराब कर्जाको स्थिति (प्रतिशतमा)
बैंक | २०७२ असोज | २०७१ असोज |
---|---|---|
सानिमा बैंक | ०.५ | ०.५ |
एसबिआइ बैंक | ०.१८ | ०.२३ |
स्टान्डर्ड चार्टड | ०.३८ | ०.२५ |
माछापुच्छ्रे बैंक | ०.४७ | २.०४ |
एभरेष्ट बैंक | ०.६७ | ०.६३ |
लुम्बीनी बैंक | १.०० | १.०४ |
इनभेष्टमेन्ट बैंक | १.०७ | २.१० |
नेपाल बंगलादेश बैंक | १.२६ | १.९४ |
नविल बैंक | १.५४ | २.१० |
मेगा बैंक | १.६० | २.१५ |
सिद्धार्थ बैंक | १.७२ | २.७४ |
ग्लोबल आइएमइ | १.९८ | २.८८ |
सिटिजन बैंक | २.३५ | २.३५ |
बैंक अफ काठमाण्डू | ३.५७ | १.१६ |
कुमारी बैंक | २.९१ | ४.३८ |
नेपाल बैंक | ३.८२ | ४.७८ |
कृषि विकास बैंक | ५.१५ | ५.६२ |
सनराइज बैंक | २.६९ | २.६९ |
प्राइम | १.७२ | २.६२ |
एनसीसी | १.८१ | २.७० |