दक्षिण अफ्रिकामा सन् २०१० मा भएको विश्वकप फुटबलपछि त्यहाँ छोरीभन्दा छोराहरु बढि जन्मिएका छन् । एक अध्ययन अनुसार विश्वकपको ९ महिनापछिबाट जन्मिएका बच्चामा छोराको संख्या बढि पाइएको हो ।
अर्ली ह्युमन डेभलपमेन्ट जर्नलका अनुसार सन् २००३ देखि २०१४ को बीचमा दक्षिण अफ्रिकामा जन्मिएका बच्चामा रहेको छोराको अनुपात भन्दा विश्वकपको ९ महिनापछि जन्मिएका बच्चामा छोराको अनुपात सबैभन्दा धेरै रहेको छ ।
शोधकर्ताहरुका अनुसार विश्वकपको बेला मानिसहरुले धेरै आराम गरे र धेरै सम्भोग क्रियामा पनि लिप्त भए ।
विटवाटर्जर्याण्ड विश्वविद्यालयका शोधकर्ता डाक्टर ग्विनाइ मासुकुमेका अनुसार विश्वकपका बेला मानिसहरुमा तनावको मात्रा कम भयो, उनीहरु खुसी थिए भने एक अर्कोप्रति तथा देशका प्रति समेत राम्रो भावनाले ओत्प्रोत थिए ।
मानिसहरु यो समयमा धेरै सम्भोग क्रिया गरेका र अधिक सम्भोगका कारण छोरी भन्दा छोरा जन्मिने सम्भावना बढि हुने हुनाले दक्षिण अफ्रिकामा विश्वकप पछि छोराहरु बढि जन्मिएका शोधकर्ताको भनाइ छ ।
विश्वकपको ९ महिनापछि जन्मिएका बच्चामा छोराको अनुपात ०.५०६३ थियो । अर्थात् आधाभन्दा धेरै छोरा थिए । सन् २००३ देखि २०१२ को बीच यो अनुपात ०.५०२९ थियो । यसको मतलब खेलका दौरान १०८८ बढि छोरा जन्मिए ।
पुरुष शुक्रकिटको उच्च गतिशीलता, अधिक सम्भोग तथा गर्भमा रहेका छोरा भ्रुणको मृत्यु कम हुनु छोरा धेरै जन्मिनुनका कारण हुन सक्छन् । यो कुनै मौसमी परिवर्तन वा काकताली नभएको उनीहरुको ठम्याइ रहेको छ ।