७ मंसिर, काठमाडौं । अर्जेन्टिनाको राष्ट्रपति चुनावमा कन्जरभेटिभ पार्टीका माउरिसियो माक्री विजयी भएका छन् ।
लगभग सबै भोटहरु गणना भइसक्दा माक्रीले सत्ताधारी पार्टीका उम्मेदवार डेनियल सिओलीलाई पछाडी पारेका हुन् । माक्रीको पक्षमा ५१.५ प्रतिशत र सिओलीको ४८.५ प्रतिशत भोट खसेको छ ।
बुयनोस एयर्समा आयोजित विजयसभाका क्रममा नवनिर्वाचित राष्ट्रपति माक्री खुशीले मञ्चमै नाचेका थिए । उनको जितले अर्जेन्टिनामा पेरोनिस्ट पार्टीको १२ वर्ष लामो सत्ता यात्राको अन्त्य गरेको छ ।
‘आज ऐतिहासिक दिन हो,’ ठूलो संख्यामा रहेका समर्थकलाई सम्वोधन गर्दै माक्रीले भने, ‘नयाँ युगको प्रारम्भ भएको छ ।’
माक्री हाल बुयनोस एयर्सका मेयर हुन् । पहिलो चरणको मतदानमा सिओलीबाट पराजित भएका उनका लागि यो ठूलो ‘टर्नअराउन्ड’ थियो ।
बुयनोस एयर्स प्रान्तका गभर्नर सिओलीले सोझै विजेता बन्नका लागि आवश्यक संख्यामा अग्रता लिन नसक्दा देशको इतिहासमा पहिलोपटक दोस्रो राउण्डको मतदान भएको थियो ।