९ मंसिर, काठमाडौं । काठमाडौंस्थित भारतीय दूताबासले सुनसरीमा भारतीय सीमा सुरक्षा बल एसएसबीले नेपाली भूमिमा प्रवेश गरेर गोली नचलाएको दाबी गरेको छ ।
बुधबार बिहान साढे ६ बजे तिरको समयमा एसएसबीले सुनसरीस्थित नेपाली भूमिमा छिरेर गोली चलाउँदा चार जना नेपाली घाइते भएका थिए ।
तर, भारतीय दूतबासले बुधबार विज्ञप्ति जारी गरेर घटनामा नेपाली नागरिक घाइते नभएको समेत दाबी गरेको छ ।
दूताबासले भनेको छ-‘एसएसबीको गस्ती टोलीले तस्करहरुको एक समूह सुनसरी जिल्ला पार गर्दै भारतीय क्षेत्रमा फेला पार्यो ।’
उनीहरुलाई पक्राउ गर्न खोज्दा एसएसबीमाथि आक्रमण गरेको र एक सुरक्षाकर्मी घाइते भएको दूताबासले बताएको छ । दूताबासले भनेको छ- ‘यो घटना भारतीय भूमिमा भएको हो र कोही पनि नेपाली घाइते भएको छैन ।’
भारतीय दूताबासले आफ्नो विज्ञप्तिमा एसएसबीले नेपाल-भारत सीमामा सुरक्षा कायमै राख्ने समेत बताएको छ ।
