११ मंसिर, काठमाडौं । सुनसरीको हरिपुरमा भारतीय सीमा सुरक्षा बल एसएसबीले गोली चलाउँदा चार जना नेपाली घाइते भएको घटनालाई सरकार, तराईमा आन्दोलनरत मधेसी दलका नेता तथा भारतीय दूतावासले बेग्ला बेग्लै प्रतिक्रिया दिएका छन् । मधेसवादी दलका नेता लक्ष्मण कर्णले तस्करलाई जसले पनि कारबाही गर्छ भनेका छन् भने नेपाल सरकारले गोली हान्नेलाई कारबाही गर्न भारतसाग माग गरेको छ । यस्तै भारतीय दूतावासले भने आत्मरक्षाका लागि गोली चलाएको दाबी गरेको नयाँ पत्रिकामा खबर छ ।
तस्करलाई जसले पनि कारबाही गर्छ : लक्ष्मणलाल कर्ण
हामीले आन्दोलन र नाकाबन्दी गरेका छौँ । तेल रोकिरहेका छौँ । त्यस्तो वेला तस्करी गर्न पाइँदैन । तस्करी गर्नेलाई जुनसुकै देशले पनि कारबाही गर्न सक्छ । नेपाली भूमिमा आएर गोली हानेको हो कि होइन भन्ने कुरा राज्यले अनुसन्धान गर्नुपर्छ । यो हाम्रो विषय होइन ।
गोली हान्नेलाई कारबाही गर्न भारतलाई नेपालको आग्रह
नेपालभित्र पसेर चारजना नेपालीलाई गोली हान्ने एसएसबीका जवानलाई कारबाही गरी नेपाललाई जानकारी दिन परराष्ट्र मन्त्रालयले भारतसँग आग्रह गरेको छ । परराष्ट्र मन्त्रालयले बिहीबार विज्ञप्ति जारी गरी त्यसबारे जानकारी गराएको हो ।
आत्मरक्षाका लागि गोली : भारतीय दूतावास
एसएसबीले आत्मरक्षाका लागि गोली चलाएको दाबी गर्दै भारतीय दूतावासले बुधबार विज्ञप्ति निकालेको थियो । सुरक्षा बलको पेट्रोल टोलीलाई तस्करहरूले आक्रमण गरेपछि आत्मसुरक्षाका लागि फायर गरेको विज्ञप्तिमा उल्लेख छ ।
