रामप्रसाद ढुंगेल
यूएई । यूएईका सातै इमिरेट झकिझकाउ देखिएका छन् । घरघरमा राष्ट्रिय झन्डा फरफराइ रहेका छन् ।
थरिथरिका बिजुली बत्तीले गगनचुम्बी महलहरु धपक्कै बलेका छन् । सफा, चिल्ला र फराकिला बाटाहरुमा ४४ अंकित संकेतका साथमा सप्तरंगी इलेक्टिक बत्तीहरु बलिरहेका छन् । स्थानीय नागरिक तथा बालबालिकाहरु गालाभरी झन्डा र ४४ नम्बर पोतेर कुनै फनपार्क, सामुद्री किनार या सपीङ मलहरुमा डुलिरहका भेटिन्छन् । खजुरका बोटहरु पनि धपक्कै बलेका छन् । बेहुलीझै सिंगारिएको छ यूएई अर्थात् संयुक्त अबर इमिरेट । यस्तो लाग्छ यूएईले कुनै ठूलै युद्ध जितेको छ ।
युद्ध त जितेकै हो यूएईले आजभन्दा ४४ वर्ष अघि । ब्रिटिस साम्राज्यबाट मुक्त भएको खुसियालीमा ४४ औ राष्ट्रिय दिवसको तयारीमा होम्मिएका यूएईका बासिन्दामा कुनै युद्ध जितेको भन्दा कम उत्साह छैन ।
सन् १९७१ को डिसेम्बर २ तारिख संयुक्त अरब इमिरेट ब्रिटिसहरुबाट स्वतन्त्र भई एकताको मालामा उनिएको हो । सुरुमा अबुधाबी, दुबई, सारजा, अजमान, फुजेरा र उमअलक्वीम एकताबद्ध भएका थिए भने एक वर्षपछि रासअल खेमा पनि यूएईमा आबद्ध भएको थियो । यी सातै इमिरेटको एकता, राष्ट्रियता र सहकार्यका कारण यूएई विश्वमान चित्रमा हिजो आज रातारात चम्किरहेको छ ।
विश्वकै सपिङ हबको रुपमा विकसित दुबई संसारकै अग्लो टावर, पामजुमेरा, अत्याधुनिक आर्किटेक्ट, खुल्ला अर्थनीति, यूरोपियन जीवनशैलीका कारण धेरैको चासोको केन्द्र बन्दै गएको छ ।
यतिमात्र होइन, वैदेशिक रोजगारीको सिलसिलामा चार लाखभन्दा बढी नेपाली रहेका कारण यूएई धेरै नेपालीहरुको चासोको केन्द्र बनेको छ । साधारण मजदुर, हाउसमेड देखि, होटल, सेल्स, सेक्युरिटीसम्म र बहुराष्ट्रिय कम्पनीका उच्चपदहरुमा नेपालीहरुको उल्लेख्य उपस्थिति छ ।
थप तस्वीर हेर्नुहोस्