१४ मंसिर, जनकपुर । मधेस आन्दोलनको समर्थनमा सडकमा निस्कन ठिक्क परेका धनुषा कांग्रेसका नेता कार्यकर्ता अन्तिममा आएर रोकिए ।
तराई मधेसमा आन्दोलनरत मधेसी मोर्चा र मधेसी गठवन्धनको चेतावनीका बीच कांग्रेस कार्यकर्ता पार्टीको झण्डासहित सडकमा आउने तयारीमा जुटेका थिए ।
कांग्रेसका नेता कार्यकर्ता चारतारे झण्डा लिएर स्थानीय पिडरिया माइथानमा रहेको पार्टी कार्यालयमा पुगिसकेका थिए । त्यहाँ ८ र २२ बुँदे सहमति कार्यान्वय गर भनेर लेखिएको कालो ब्यानरसमेत तयार पारिएको थियो ।
तर, कार्यालय नजिकै आन्दोलनकारीले टायर बालेर धर्ना दिएपछि कांग्रेस कार्यकर्ताहरु सडकमा निस्कन सकेनन् । कांग्रेस मधेस आन्दोलनमा आउने हो भने पार्टीको झण्डा बोक्न नपाउने आन्दोलनकारीहरुको सर्त थियो ।
कांग्रेसले पार्टी झण्डासहित आन्दोलनमा आउने बताएपछि विहानैबाट जनकपुरमा तनाव सुरु भएको थियो । आन्दोलनकारीले शहरका विभिन्न स्थानमा टायर बालेर प्रदर्शन गरेपछि मुठभेडको खतरा बढेको थियो ।
अन्ततः मुठभेड हुने अवस्था आएको भन्दै कांग्रेसको जिल्ला कार्यसमिति धनुषाले कार्यक्रम स्थगित गरेको छ । कांग्रेसका धनुषा सभापति रामसरोज यादवले अरुलाई आन्दोलन नै गर्न नदिनु अतिवादी सोच भएको बताए ।
