१५ मंसिर, काठमाडौं । एकीकृत नेकपा माओवादी अध्यक्ष प्रचण्डले एमाओवादी पार्टीभित्र क्यान्सर लागेको भन्दै शल्यक्रिया गर्नुपर्ने बताएका छन् ।
‘क्यान्सरझै फैलिइरहेको गुटबन्दी, अराजकता, व्यक्तिवादजस्ता ग्रैह सर्वहारा आचरण र कार्यशैली हटाउन आज पार्टीमा ठूलो शल्यक्रियाको खाँचो छ,’ मंगलबार पेरिसडाँडामा आयोजित केन्द्रीय समिति बैठकमा २७ पृष्ट लामो राजनीतिक प्रतिवेदन पेश गर्दै प्रचण्डले भनेका छन्-‘पार्टी पुनर्निर्माणको अन्तिम अवसरका रुपमा केन्द्रीय समितिको यो बैठकले त्यो शल्यक्रिया गरी क्यान्सर लागेको भाग हटाउन आँट गर्नैपर्छ ।’
रुपान्तरणसहित पार्टी पुनर्निर्माणको अभियानमा दृढतापूर्वक लागौं भन्ने लामो शीर्षक प्रचण्डले राखिएको दस्तावेजमा प्रचण्डले मार्क्सवाद लेनिनवाद र मालेमावादको विकास गर्दै समाजवाद र साम्यवादको बाटोमा अघि बढ्ने क्रान्तिकारी पार्टी निर्माण गर्नुपर्ने बताएका छन् ।
प्रचण्डको दस्तावेजमा भनिएको छ-‘आज हाम्रा अगाडिको मुख्य चुनौती सही विचार, रणनीति र कार्यनीति निर्धारणको होइन, बरु त्यसलाई दृढतापूर्वक कार्यान्वयन गर्ने क्रान्तिकारी पार्टी निर्माणको हो ।’
‘क्यान्सर’ हटाउन १५ बुँदे आचारसंहिता
प्रचण्डले पार्टीभित्रको क्यान्सर हटाउने उपायस्वरुप १५ बुँदे आचार संहिता प्रस्ताव गरेका छन् । आचार संहितामा स्थायी समितिभन्दा तल्लो तहका नेताहरुलाई गाडी प्रयोगमा रोक लगाउने प्रस्ताव गरिएको छ ।
साथै केन्द्रीय नेताहरुले समेत अनिवार्य श्रम गर्नुपर्ने र छोराछोरीलाई विदेश, महंगा निजी तथा आवासीस स्कुलमा पढाउन नपाउने प्रचण्डको प्रस्ताव छ । आइएनजीओ /एनजीओमा काम गर्नसमेत प्रचण्डले पार्टी नेता/कार्यकर्ताहरुलाई रोक लगाउने प्रस्ताव गरेका छन् ।
मंगलबारबाट सुरु भएको केन्द्रीय समितिको बैठकमा प्रचण्डले कडा आचारसंहिता प्रस्ताव गरेका छन् । जसमा केन्द्रीय समितिका सबै सदस्यहरु पूर्णकालीन पेवेशर क्रान्तिकारी हुनु पर्नेसहितका १५ वटा बुँदागत सर्तहरु छन् ।
के-के छ आचारसंहितामा ?
पार्टीको निर्णय र योजनाविना आर्थिक उपार्जनको काम गर्न नपाउने र आय व्ययको विवरण प्रत्येक तीन महिनामा केन्द्रीय कार्यालयमा बुझाउनुपर्ने प्रस्तावित आचार संहितामा उल्लेख छ ।
पार्टीको विशेष योजनाअन्तरगत गरिएका निर्णय बाहेक आइएनजीओ र एनजीओमा संलग्न हुन नपाइने अर्को सर्त छ । केन्द्रीय सदस्यहरुले भ्रष्टाचार, तस्करी तथा पार्टीको नाममा आफ्ना लागि चन्दा लिए गम्भीर अपराधको रुपमा लिएर कडा कारबाही गर्ने आचार संहितामा उल्लेख छ ।
एमाओवादीले स्थायी समिति सदस्यहरुले गाडी प्रयोग गर्न पाउने प्रस्ताव गरिएको छ । राज्य कार्यालयहरुमा कार्यालय प्रयोजनका लागि एउटा गाडी दिने र केन्द्रीय सदस्यहरुले आवश्यक परे मोटरसाइकल प्रयोग गर्ने प्रचण्डको प्रस्तावमा उल्लेख छ ।
साथै स्थायी समिति सदस्यलाई एकजना ड्राइभर र दुईजना सहयोगी तथा पोलिटब्यूरो सदस्यलाई एकजना सहयोगी दिइने प्रचण्डको प्रस्ताव छ । सुरक्षा लगायत विशेष कारणले कसैले गाडी वा सहयोगी आवश्यक परे केन्द्रीय कार्यालयको अनुमति लिनुपर्ने प्रचण्डको प्रस्ताव छ ।
परिवारका सदस्य पार्टीमा लाग्नैपर्ने
केन्द्रीय सदस्यहरुका एकाघर परिवारका सदस्यहरु पार्टी वा पार्टीसँग सम्बन्धित कुनै न कुनै संगठनमा आवद्ध हुनैपर्ने भएको छ । साथै केन्द्रीय पदाधिकारीले दुई महिनामा एक दिन र अन्य केन्द्रीय सदस्यहरुले महिनामा एक दिन शारीरिक श्रममा भाग लिनु पर्ने प्रस्तावमा उल्लेख छ ।
बुधबार प्रचण्डको प्रतिवेदन अध्ययन गर्न केन्द्रीय सदस्यहरुलाई समय दिइएको छ । अर्को बैठक विहीबार बस्ने छ ।
