काठमाडौं । विगत एक दशकदेखि सुषुप्त अवस्थामा रहेको ‘कन्दरा’ व्याण्डको पुनरागमन प्रयासले उत्साहजनक गति लिन थालेको छ ।
भर्खरै मात्र हङकङमा लाइभ कन्सर्ट दिएर स्वदेश फर्किएको कन्दरा दक्षिण कोरियामा अर्को लाइभ कन्सर्ट दिन बिहिबार राती कोरियातर्फ प्रस्थान गरेको छ ।
कोरियोको सिओल तथा बुसानमा यही आइतबार तथा सोमबार लाइभ कन्सर्ट प्रस्तुत गर्न गायक विवेक श्रेष्ठको नेतृत्वमा कन्दरा ब्याण्ड त्यसतर्फ प्रस्थान गरेको हो ।
लामो समयको रिक्ततापछि पनि ‘हङकङ पोखरा’, तिमी पारी’, ‘तगारोमा रुमाल राखी’, ‘लेककी हे माया’ जस्ता लोकपि्रय गीतहरुले कन्दरालाई जिवन्तता दिइरहेको छ ।
आफ्नो पाँचौं एल्बमलाई आगामी फागुन महिनामा बजारमा ल्याउने जमर्को गरिरहेको कन्दराले यसको बजार व्यवस्थानको जिम्मा स्टेरियो रेकर्ड्सलाई दिएको छ ।
कोरियाको कन्सर्टपछि स्वदेश फर्किएर कन्दराले एल्बमको विमोचन, काठमाडौंको कन्सर्ट तथा अन्य वैदेशिक सांगीतिक टूरलाई निरन्तरता दिने ब्याण्डका प्रवर्द्धक आशिष पराजुलीले बताएका छन् ।
