क्वालालम्पुर । मलेसियामा रहेका गैरकानुनी विदेशी कामदारहरुले आममाफी प्रकृया अबलम्बन नगरी सिधै वैधानिक हुन पाउने भएका छन् ।
मलेसियाका गृहमन्त्री अहमद हमिदिले शुक्रबार यस्तो घोषणा गरेका हुन् । मन्त्री हमिदिका अनुसार अब रोजगारदाताले सिधै अनलाइनमार्फत् आफ्ना अवैधानिक विदेशी कामदारको विबरण अपडेट गरेर वैधानिकीकरणको प्रकृया थाल्न सक्नेछन् ।
सरकारले पहिलोपटक आममाफी र बैधानिक बनाउने प्रकृयामा दलालको संलग्नतालाई निषेध गर्न खोजेको छ ।
‘एजेन्टकै कारण धेरै विदेशी कामदारले पैसा तिरेर पनि वैधानिक हुन नसकेको अबस्था देखियो’ गृहमन्त्री हमिदिले भने- ‘यस्तो समस्या देखेपछि हामीले सिधै रोजगारदाताले अनलाइन आबेदन गर्ने ब्यबस्था थालेका हौं ।’
अनलाइन प्रकृयाबाट रोजगारदाताले प्रमाणीकरण गर्दा कुनै पनि जरिवाना नलाग्नेसमेत गृहमन्त्रीले जानकारी दिए । तर, सरकारले तोकेअनुसारको लेभी भने बुझाउनुपर्ने मलेसियाको स्थानीय दैनिक ‘द सन‘ ले जनाएको छ ।
गृहमन्त्री हमिदिले हालै करिव २५ लाख बिदेशी कामदार मलेसियामा अवैधानिकरुपमा काम गरिरहेको बताएका थिए । त्यसमध्ये हजारौंको संख्यामा नेपाली रहेको अनुमान गरिएको छ ।
अब नेपाली कामदारले आफ्नो रोजगारदातामार्फत् नै वैधानिक हुने प्रकृया अबलम्बन गर्नुपर्ने छ । त्यसो गर्दा नेपाली कामदारले हाल काम गरिरहेको स्थानमा बैधानिक बनेर काम गर्न पाउनेछन् ।