काठमाडौं । तीज आउन अझै चार महिना बाँकी छ । तर, चर्चित लोक-गायक गायिकालाई तीज कार्यक्रमको निम्तो आउन थालिसकेको छ ।
पशुपति शर्मालाई एउटा होइन, चारवटा देशबाट गीत गाउन निम्तो आएको छ । इजरायल, दुबई, जापान र अष्ट्रेलियाका नेपाली समुदायले उनलाई बोलाएका हुन् ।
‘अहिलेसम्म गीतै बनाएको छैन, चारवटा मुलुकवाट निम्तो आईसक्यो,’ शर्माले अनलाइनखबरसँग कुरा गर्दै भने, ‘जेठ लागेपछि गीत बनाउनु पर्ला ।’ अष्टे्रलियाको सिड्नीमा त उनको गाउने मिति नै पक्का भइसकेको छ ।
यसपाली कति गीत गाउने भन्ने उनले सोचिसकेका छैनन् । तर, मौलिक गीत बनाउने दाबी गरे । गएको वर्ष उनले तीजमा मात्रै ७ नयाँ गीत गाएका थिए ।
सुनिताको जापान पक्का
जापानमा हुने तीज स्पेशल कार्यक्रमका लागि सुनिता दुलालले पक्का गरिसकिन् । अष्टे्रलिया र युरोपका अन्य ६ मुलुकवाट पनि उनलाई निम्तो आइसकेको छ ।
‘थुप्रै मुलुकबाट निम्तो आइसकेको छ । म्यानेज गर्दै छु,’ सुनिताले भनिन् । विगतमा पनि तीज आउनु केही महिनाअघि नै कार्यक्रमका लागि निम्तो आउने गरेको उनी सुनाउछिन् ।
यसपाली तीजकै सन्दर्भमा तीनवटा गीत गाउने योजनामा रहेकी सुनिताले एउटा गीत पक्का गरिसकिन् । सुरेश अधिकारीको शब्द र संगीतमा उनले स्वर भर्न मात्रै बाँकी छ । ‘अर्को महेश खड्काको शब्द-संगीतमा हुने छ । त्यो पनि एक-दुई दिनमा फाइनल हुन्छ ।’ उनले भनिन् । यसपाली एउटा गीतको भिडियोको सुटिङ क्यानडा र अमेरिकामा गर्ने योजना छ उनको ।
अर्की गायिका मञ्जु पौडेललाई पनि केही मुलुकबाट निम्तो आई सकेको छ । कोमल वली, शोभा त्रिपाठी, मुना थापा मगर लगायतलाई पनि निम्तो आउने क्रम सुरु भएको छ ।