२० वैशाख, काठमाडौं । दक्षिण एसियामा रहेका शरणार्थीहरू र उनीहरूले भोग्नु परेका समस्या र तिनको निदानको विषयमा छलफल गर्ने उद्देश्यले आयोजना गरिएको क्षेत्रिय सम्मेलन काठमाडौँमा शुरु भएको छ । दुई दिनसम्म चल्ने सम्मेलनको उदघाटन राष्ट्रिय मानव अधिकार आयोगका अध्यक्ष अनुपराज शर्माले गरे ।
कार्यक्रममा उनले नेपालमा विदेशी शरणार्थीहरूको व्यवस्थापन चुनौतिपूर्ण बन्दै गएको र राष्ट्र संघको शरणार्थी सम्बन्धि निकायसँग सहकार्य गर्दै आयोग अगाडि बढेको बताए ।नेपालमा रहेका भुटानी शरणार्थीहरू विश्वकै ठूलो पुनर्वास कार्यक्रम अन्तर्गत पश्चिमा देशहरूमा पठाइएको स्मरण गर्दै उनले नेपालमा शरणार्थी व्यवस्थापन चुनौतिपूर्ण रहेको बताए । ‘हामीले शरणार्थीहरूको अवस्थाका बारेमा निरन्तर अनुगमन गरिरहेका छौँ र सरकारलार्इ यस मामिलामा बेला-बेलामा सुझाव पनि दिने गरेका छौँ, ‘ उनले भने ।
सेन्टर फर साउथ एसियन स्टडिजका डा. निश्चलनाथ पाण्डेले दक्षिण एसियामा शरणार्थीहरूको अवस्थाबारे प्रकाश पार्दै भने, ‘भारतमा दुर्इ लाख, र नेपालमा ४० हजार शरणार्थी छन् भने श्रीलङ्कामा ३० हजार भन्दा बढी व्यक्ति विस्थापित छन् । यी आँकडाहरूले पनि देखाउँछन् दक्षिण एसियामा शरणार्थीको समस्या विकराल छ ।’
सेन्टर फर साउथ एसियन स्टडिज (नेपाल), कोनराड आडेनोयर स्टिफटिङ र दक्षिण एसियाली थिङ्क ट्याङ्क कन्सोर्टियमको संयक्त आयोजनमा भइरहेको सम्मेलनमा एक दर्जन भन्दा बढी कार्यपत्र प्रस्तत हुनेछन् ।
