२२ वैशाख, काठमाडौं । सत्ता गठबन्धनका दलहरुले एकीकृत नेकपा माओवादीलाई सरकार परिवर्तनको निर्णय पुनर्विचार गर्न आग्रह गरेका छन् ।
प्रधानमन्त्री निवास बालुवाटारमा बुधबार बेलुकी बसेको सरकारमा रहेका दलहरुको संयुक्त बैठकले वर्तमान सत्ता गठबन्धन जारी राख्नुपर्ने निष्कर्ष निकाल्दै एमाओवादीलाई निर्णय फिर्ता लिन आग्रह गरेको हो ।
‘वर्तमान सरकार गठबन्धनलाई एकताबद्ध राख्दै एमाओवादीलाई आफ्नो निर्णयमा पुनर्विचार गर्न आग्रह गर्ने निर्णय भयो,’ प्रधानमन्त्रीका प्रेस सल्लाहकार प्रमोद दाहालले भने ।
एकीकृत माओवादीले वर्तमान सरकार परिवर्तनको निर्णय गरेपछि प्रधानमन्त्री केपी शर्मा ओलीले सत्ता गठबन्धनमा रहेका दलहरुको धारणा बुझ्न बैठक बोलाएका थिए ।
