२३ वैशाख, काठमाडौं । एकीकृत नेकपा माओवादीका नेता जनार्दन शर्मा ‘प्रभाकर’ले राष्ट्रिय सहमति कायम नभएसम्म केपी शर्मा ओली नेतृत्वकै सरकार रहने स्पष्ट पारेका छन् । वर्तमान सरकारलाई ढाल्न एमाओवादी लागेको भन्ने हल्लामा विश्वास नगर्न उनले सबैलाई आग्रह पनि गरे ।
व्यवस्थापिका संसदमा बिहीबार बोल्दै एमाओवादी स्थायी समिति सदस्य प्रभाकरले भने, ‘कागले कान लग्यो भन्दैमा आत्तिनै पर्दैन । एमाओवादीले सरकार ढाल्न खोजेको होइन । सरकार ढाल्न लाग्यो भन्ने आरोपको पछाडि नलाग्नुस् ।’
उनले एमाओवादी बाहेक अरु कुनै दलको नेतृत्वमा राष्ट्रिय सहमति कायम भयो भने पनि एमाओवादी सहयोग गर्न तयार रहेको स्पष्ट पारे ।
वर्तमान सरकारले शान्ति प्रक्रिया सुल्झाउने भन्दा पनि बल्झाउने काम गरेकोप्रति आफूहरुको आपत्ती रहेको पूर्व शान्ति मन्त्रीसमेत रहेका प्रभाकरले बताए ।
उनले कालोबजारी नियन्त्रण गर्न नसकेको र जनताले राहत महसुस हुने गरी काम गर्न सरकारले नसकेको भन्दै आलोचना पनि गरे ।
