२४ वैशाख, रुकुम । मानव विकास तथा सामुदायिक सेवाद्वारा सञ्चालित रुकुमको चौरजहारी अस्पतालमा मृत्यु भएकी एक बालिकाको शव १० दिनदेखि उठ्न सकेको छैन ।
बायाँ हात भाँच्चिएको उपचार गर्न उक्त अस्पतालमा भर्ना भएकी भेरीमालिका–११, मटेला जाजरकोटका अनिल शर्माकी एक वर्षीया छोरी अर्पणा शर्माको उपचारकै क्रममा मृत्यु भएपछि आफन्तले शव नबुझेका हुन् ।
अस्पतालको लापर्बाहीले बालिकाको मृत्यु भएको आफन्तजनको जिकिर छ । आफ्नो छोरीको मृत्यु डाक्टरकै लापर्बाहीका कारण भएको भन्दै बुबा अनिलले क्षतिपूर्ति र उपचारमा संलग्नमाथि कारबाही नभएसम्म शव नबुझ्ने जानकारी दिए ।
‘हात भाँच्चिएकी छोरीलाई अर्कै सुई लगाएर अस्पतालले मारेको हो,’ मृतक बालिकाका बुबा शर्माले भने, ‘सिक्दै गरेका प्रशिक्षार्थीले नजानेर लगाएको इन्जेक्सनले मृत्यु भएको हो । क्षतिपूर्ति र दोषीलाई कारबाही नभएसम्म शव बुझ्दैनौँ ।’
तर अस्पताल प्रशासनले भने हात भाँच्चिएर उपचाररत बालिकाको आमाले दूध चुसाउने बेला सर्किएर (सर्को परेर) मृत्यु भएको बताएको छ ।
बायाँ हात भाँच्चिएर अस्पतालमा वैशाख ६ गते भर्ना गरेकी बालिकाको ७ गते शल्यक्रिया गरेर हातको शल्यक्रिया गरिएको थियो । नौ गते बिहान आमाले दूध चुसाउँदा दूध सर्किएर फोक्सोमा गई बेहोस भएकी बालिकाको डा. कालेव बुढालगायत अन्य स्वास्थ्यकर्मीको समूहले फोक्सोमा गएको दूध तानेको बताइएको छ । लगातार भेन्टिलेटरमा राखेर उपचार गराइरहेकी बालिकाको पाँच दिनपछि निधन भएको अस्पतालका प्रशासक डिलबहादुर गिरीले बताए ।
दूध सर्केर मृत्यु हुने समस्यालाई स्वास्थ्य विज्ञानले पनि जित्न नसकेको र अभिभावकले लगाएको यो आरोप कुनै पनि हालतमा स्वीकार गर्न नसकिने उपचारमा संलग्न अस्पतालका डा. कालेव बुढाले बताए ।
‘अस्पतालको औषधि र सुईमा कुनै पनि शङ्का लागेमा प्रयोगशाला परीक्षण गर्न र छानबिन समिति गठन गरेर सत्यतथ्य पत्ता लगाउन हामीले भनेका छौँ,’ डा. बुढाले भने ।
मृतकका आफन्तले दोषीलाई कारबाही र क्षतिपूर्तिको माग गर्दै जिल्ला प्रशासन कार्यालय रुकुममा उजुरीसमेत दिएका छन् ।
रुकुमका सहायक प्रमुख जिल्ला अधिकारी शेरबहादुर पुनको पहलमा पीडित पक्ष र अस्पताल प्रशासनबीच पटक-पटक भएको वार्ता सहमतिमा पुग्न नसकेको भए पनि छानबिन समिति गठन गरेर समस्या समाधान गर्ने सहमति भएको बताइएको छ ।
पीडित पक्षले अस्पतालमा तोडफोड गर्न सक्ने भन्दै प्रहरीले लामो समयदेखि सुरक्षा दिँदै आएको छ । रासस
