१२ जेठ, काठमाडौं । नेकपा माओवादी केन्द्रका नेता देव गुरुङले अहिलेको सरकारलाई निरन्तरता दिनु पर्ने बताएका छन् । उनले तत्काल सरकार परिर्वतनको सम्भावना नरहेको समेत सुनाए ।
रिपोर्टर्स क्लब नेपालले बुधबार आयोजना गरेको साक्षात्कारमा नेता गुरुङले भने, ‘ सरकार परिवर्तन राष्ट्रिय सहमति भयो भने मात्रै हुने हो । अहिले सम्भावना छैन ।’
उनले माओवादी केन्द्रमा सरकार परिवर्तनबारे कुनै छलफल समेत नभएको स्पष्ट पारे ।
मधेसीसहित आदिवासी जनजातिको माग आधारभूत रुपमा ठीकै भएको भन्दै नेता गुरुङले लचकता अपनाएर त्यसलाई सम्बोधन गर्नु पर्ने बताए ।
उनले भने, ‘आन्दोलनरत र अरु दलको पोजिसन हेर्दा सहमतिको सम्भावना देखिन्छ । त्यसैले अहिले सहमतिका लागि पहल गर्नुपर्छ ।’