१५ जेठ, ताप्लेजुङ । बन्यजन्तुले मानिस माथिनै आक्रमण गर्न थालेपछि ताप्लेजुङको कालिखोला गाविसका स्थानीयले गाउँनै छाड्न थालेका छन् ।
मानिस र घर पालुवा बस्तुभाउमाथि चितुवा र भालुले आक्रमण गर्न थालेपछि हाल सम्म २२ परिवारले गाउँ छाडि अन्यत्र बसाई गएको कालीखोला ९ का स्थानिय विजय चापागाईंले बताए ।
गाउँ वरीपरि बाक्लो जंगल बढेको र दैनिक जसो जंगलबाट आउने कालो भालु र चितुवाले मानिस र घरपालुवा जनावर माथि आक्रमण गर्ने र लगाएको बालि पनि सखाप पार्ने भएकाले स्थानियको बसाई सार्नु बाहेकको विकल्प नभएको चापागाईको भनाइ छ ।
भारतसँग सिमाना जोडिएको यो गाविसमा भालु, बाघ, चितुवा, वन कुकुर, मृग, घोरल, कालिज, दुम्सीजस्ता जनावरको ‘आतंक’ बढेको कालीखोला सामुदायिक वन उपभोक्ता समितिकी सदस्य देवीमाया बानियाँले बताइन् । यी बन्य जन्तु नजिकैको सामुदायिक बन र सिमाना जोडिएको भारतको निकुञ्ज र आरक्षा क्षेत्र बाट समेत आउने गरेको उनको भनाइ छ ।
बसाईसरी गएकाहरु अधिकांश नजिक रहेको पाँचथर जिल्लाको फलैंचा गाविसमा बसेका छन् । विस्थापित उनीहरू गुजाराका लागि मध्यपहाडी लोकमार्गछेउमा टहरो बनाउने, व्यापार गर्ने र अधियाँमा खेती गर्न थालेका छन् । केही परिवार इलाम र झापा समेत झरेको स्थानियको भनाई छ ।
स्थानीयले गाउँ छाड्न थालेपछि घरहरु सबै जिर्ण अबस्थामा रहेका छन् भने अरू दर्जनभन्दा बढी परिवार पनि गाउँ छाड्ने तयारीमा रहेको कालीखोला ४ का खोमनाथ बानियाँले बताए ।
पहिले बन जंगल जोगाउन पर्छ भन्ने सरकारी तथा गैर सरकारी कार्यालयले बन जंगल बढे सँगै बन्य जन्तुको आक्रमणले स्थानिय नै बसाई सर्दा समेत वेवास्था गरेको उनिहरुको गुनासो रहेको छ ।
वन अधिकृत माधव देवले भने स्थानीयले वन्यजन्तु आतंकबारे मौखिक गुनासो गरे पनि लिखित जानकारी नदिएको बताएका छन् । लिखितरुपमा आएमा क्षतिपूर्तिको प्रावधान भएकाले लिखित निवेदन सम्बन्धित निकायमा पठाउने उनको भनाइ छ ।