बलिउड नायक सलमान खान र निर्देशक कविर खानले ‘एक था टाइगर, बजरंगी भाइजान’ जस्ता सुपरहिट चलचित्र दिएका छन् । अब, यी दुई चलचित्रकर्मी मिलेर ‘ट्यूबलाइट’ नामक चलचित्र बनाउँदैछन् । यो चलचित्रका लागि कविर खान नायिका कट्रिना कैफ लिन चाहन्छन् । तर, कैफसँग काम गर्न सलमानलाई मन छैन ।
सलमानले कैफको ठाउँमा नायिका दीपिका पादुकोणको नाम सिफारिश गरेका छन् । तर, सलमानको कुरामा कविर सहमत छैनन् । उनी सलमान र कट्रिनालाई लिएर फेरि एक हिट चलचित्र बनाउन चाहन्छन् ।
यहि कुरालाई लिएर सलमान र कविरविच लामो समय बहस भएको छ । नायिका समेत परिवर्तन गर्न माहिर मानिएका सलमानले कविरलाई दीपिका लिनुपर्ने अडान राखेका छन् । तर, कविर सलमानको कुरामा सहमत छैनन् । दीपिका र सलमानले आजसम्म कुनै पनि चलचित्रमा काम गरेका छैनन् । यसैले पनि सलमान दीपिकालाई लिएर आफ्नो महत्वकांक्षी चलचित्र बनाउन चाहन्छन् ।
दीपिका र सलमानले लामो समयदेखि एक अर्कासँग काम गर्न खोजेका थिए । तर, यी दुइलाई पर्दा शेयर गर्ने अवसर मिलेको छैन । आफ्नो अडान नछाड्ने सलमान यसपटक निर्देशक कविर खानलाई मनाउन सफल हुन्छन् या हुँदैनन्, यो भने प्रतिक्षा गरौ ।
