१७ असार, काठमाडौं । नेपाल सरकारको भन्सार विभागले साउन १ गतेदेखि विदेशबाट काँचो सुन चाँदी ल्याउन प्रतिबन्ध लगाउने भनेर गरेको निर्णय खारेज गर्न प्रवासी नेपालीहरुले माग गरेका छन् । उनीहरुले प्रवासी नेपालीहरुको संस्था नेपाली साझा मञ्चमार्फत प्रधानमन्त्रीलाई खुला पत्र लेख्दै भन्सार विभागको निर्णय खारेज गर्न माग गरेका हुन् ।
सुन चाँदीका तयारी गहनामात्रै नेपाल ल्याउन दिने नीति प्रवासीहरुलाई पीडा दिने र तस्करहरुलाई फाइदा हुने खालको भएको मञ्चको ठहर छ ।
हेर्दा सानो निर्णय देखिए पनि यसबाट प्रवासी नेपालीहरुको भावनामा ठूलो ठेस पुगेको उल्लेख गर्दै उनीहरुले भन्सार विभागको नयाँ नीति खारेज गरेर साविककै नीति कार्यान्वयन गराउन र तस्करमुखी नीति ल्याउनेहरुलाई कारवाही गर्न पनि प्रधानमन्त्रीसँग माग गरेका छन् ।
नेपालको कुलगाह्रस्थमा ३० प्रतिशतभन्दा बढी योगदान दिने, नेपालकै बजेट बराबर रेमिट्यान्स भित्राउने, भारतीय नाकाबन्दीका बेला पनि रेमिट्यान्समार्फत राष्ट्रको स्वाभिमान जोगाउन महत्वपूर्ण सहयोग गरेका वैदेशिक रोजगारमा रहेका प्रवासी नेपालीहरुलाई किन अवहेलना र अपमान गरिएको हो ? भनेर उनीहरुले प्रश्न गरेका छन् ।
अमेरिका, युके, जर्मन, इटली, इजरायल, बहराईन, कुबेत, कतार, दुबई, साउदी अरब, मलेसिया लगायत देशमा रहेका प्रवासी नेपालीहरुले सयुंक्त रुपमा नेपाली साझा मञ्चमार्फत असार १६ गते सामाजिक सन्जालमार्फत खुल्लापत्र सार्बजनिक गरेका हुन् ।
मञ्चका अन्तर्राष्ट्रिय अभियन्ता महेश श्रेष्ठका अनुसार सो खुल्लापत्र ‘प्रधानमन्त्रीसँग सिधा कुरा’ टेलिभिजन कार्यक्रममा र ‘हेलो सरकार’को फेसबुक पेजमा प्रेसित गरिएको छ । त्यसैगरी भन्सार विभागलाई समेत इमेल पठाइएको छ ।
