१७ असार, काठमाडौं । नेपाली कांग्रेसका सभापति शेरबहादुर देउवाले अहिलेको संविधान उत्कृष्ट भए पनि कतिपय नमिलेका विषयहरु सच्याएर असन्तुष्ट पक्षलाई सहमतिमा ल्याउनुपर्ने बताएका छन् ।
मधेसी मोर्चा लगायत संविधानप्रति असन्तुष्ट पक्षलाई सहमतिमा नल्याएसम्म संविधान कार्यान्वयन नहुने उनले बताए ।
सहिद दशरथ चन्दको ११४ औं जन्मजयन्तीको अवसरमा शुक्रबार काठमाडौंमा आयोजित कार्यक्रममा देउवाले भने, ‘अहिलेको संविधानले सबैलाई हक अधिकार दिएको छ तर कतिपय कुरा सच्याउनुपर्ने छ । संविधानलाई सच्याएर मधेसी मोर्चाका माग सम्बोधन गर्नुपर्छ ।’
कार्यक्रममा संक्षिप्त मन्तव्य राखेका पूर्वप्रधानमन्त्री देउवाले केन्द्र, प्रान्त र स्थानीयको निर्वाचन गराएपछि मात्रै पहिलो चरणमा संविधान कार्यान्वयन भएको मानिने बताए ।
उनले संविधान कार्यान्वयन भएमा र असन्तुष्ट पक्षका माग सम्बोधन भएमा मात्रै सहिदहरुको सपना पूरा हुने बताए ।