१८ असार, काठमाडौं । ढाकामा एक क्याफेमा आक्रमण गरी चरमपन्थीहरुले बन्धक बनाएका २० जनाकै हत्या भएको बंगलादेश सरकारले बताएको छ ।
बन्दुकधारीहरुले बंगलादेशको सबैभन्दा सुरक्षित मानिएको गुलशन इलाकाको क्याफेमा शुक्रबार आक्रमण गरेका थिए ।
१२ घन्टा लामो रेस्क्यु अपरेशन सकिएको छ र क्याफे अब सुरक्षाकर्मीको नियन्त्रणमा आएको छ । त्यस क्रममा ६ आक्रमणकारी मारिएका छन् भने एकलाई जीवितै पक्राउ गरिएको सरकारका एक प्रवक्ताले बताएको बीबीसीले जनाएको छ ।
आक्रमणको जिम्मा आईएसले लिएको छ । बंगलादेशको सेनाका प्रवक्ताले बताए अनुसार २० जनाको शव भेटिएको छ । र, अधिकांशलाई धारिलो हतियारले रेटेर हत्या गरिएको पाइएको छ ।
तर, उनीहरुको राष्ट्रियता अझै खुलेको छैन । तर, मारिएका सबै विदेशी छन् ।
क्याफेमा बन्दक बनाइएका १३ जनाको भने उद्दार गरिएको छ, जसमा एक जापानिज र दुई श्रीलंकाका नागरिक पनि छन् ।
