२२ असार, काठमाडौं । कांग्रेस महामन्त्री शशांक कोइरालालाई भेट्न जाने नेताहरुको ओम अस्पतालमा घुइँचो लागेको छ ।
कोइरालाको स्वास्थ्यमा एक्कासी समस्या आएपछि चाबहिलस्थित ओम अस्पतालको आइसियू कक्षमा भेन्टिलेटरमा राखेर उपचार भइरहेको छ ।
प्रधानमन्त्री एवम् नेकपा एमालेका अध्यक्ष केपी शर्मा ओली कोइरालालाई भेट्न अस्पताल पुगेका छन् । उनले कोइरालालाई आइसियू कक्षमै पुगेर भेटेका थिए ।
नेताहरुले आइसीयुकक्षमा छिरेर भेटघाट गर्दा अस्पतालमा निकै ठूलो भिडभाड भएको छ । यस्तो भिडले विरामीलाई असर पार्ने भए पनि अस्पताल प्रशासनले भीड नियन्त्रण गर्न सकेको छैन ।
प्रधानमन्त्री ओलीले कोइरालाको उपचारमा सरकारको तर्फबाट कुनै कमी हुन नदिने प्रतिवद्धता जनाए । उनीसँगै अस्पताल पुगेका मुख्यसचिव सोमलाल सुवेदीसँग प्रधानमन्त्रीले कोइरालाको उपचार प्रवन्धबारे छलफल गरे ।
शशांकलाई भेट्न कांग्रेस सभापति शेरबहादुर देउवा, नेता रामचन्द्र पौडेल, प्रकाशमान सिंह, सुजाता कोइराला लगायत अस्पताल पुगेका छन् ।
यसैगरी एमाले नेता माधवकुमार नेपाल, राप्रपा नेपालका अध्यक्ष कमल थापा, राप्रपा नेता डा. प्रकाशचन्द्र लोहनी, अख्तियार प्रमुख लोकमानसिंह कार्की पनि अस्पताल पुगेर कोइरालाको स्वास्थ्य अवस्थाबारे जानकारी लिएका छन् ।
अस्पतालमा शशांकको स्वास्थ्यबारे बुझ्न नेता, सांसद, कार्यकर्ताहरु पुग्ने क्रम जारी छ । अहिले अस्पतालमा उनीहरुको निकै ठूलो भिडभाड छ । आफन्तजनहरु चिन्तित छन् ।