९ साउन, झापा । केही दिन यता निरन्तर परिरहेको अविरल वर्षाका कारण झापामा दजनौं घर डुबानमा परेका छन् । सयौं विस्थापित भएका छन् ।
आइतबार विहान भद्रपुर नगरपालिका-५ भएर वग्ने मेची नदीमा पानीको बहाव बढ्दा १ सय १ घरपरिवार विस्थापित भएका छन् । विस्थापित परिवारहरुलाई प्रहरी र रेडक्रसको सक्रियतामा भद्रपुर उच्च माविमा सारिएको छ ।
त्यस्तै, भद्रपुर-१० र ११ मा गरी ४० घर डुबानमा परेको नेपाल रेडक्रस सोसाइटी जिल्ला शाखा झापाले जनाएको छ । त्यहाँ एक घर विस्थापित भएको जनाइएको छ ।
यस्तै, घेराबारी-५ मा १३ घर डुबानमा परेका छन् । उनीहरु सुरक्षित स्थानमा सर्न नसकेपछि अहिले स्थानीय डुङ्गा प्रयोग गरेर सुरक्षित स्थानमा सार्ने काम भइरहेको रेडक्रस झापाका सभापति लोकराज ढकालले जानकारी दिए ।
त्यसै गरेर, विर्तामोड नगर क्षेत्र भएर बग्ने अन्दुवा खोलामा पानीको बहाव बढेर मानव वस्तीमा पस्दा ११ घर डुबानमा परेको नेपाल रेडक्रसले जनाएको छ ।
जिल्लाको विर्तामोडसहित भद्रपुर, चकचकी, घैलाडुब्बा, घेराबारी लगायतका क्षेत्र समेत डुबानमा परेका छन् । रेडक्रसले जनाए अनुसार चकचकी-८ मा २५, चकचकी-१ मा ८ र घैलाडुब्बामा ५० घर डुबानमा परेको छ ।
अनलाइनखबरलाई शनिबार साँझसम्म प्राप्त रेकर्ड अनुसार झापामा विस्थापित हुने घरपरिवारको सङ्ख्या ९६ थियो । योसँगै अब जिल्लामा विस्थापित हुने घरपरिवारको सङ्ख्या १ सय ९८ पुगेको छ ।
