साउन २१ गते ३ वटा नेपाली चलचित्र प्रदर्शनमा आउँदैछन् । त्यसमध्ये एक हो, चलचित्र ‘एक पल’ । यो चलचित्रलाई राज शाक्यले सम्पादन तथा निर्देशन गरेका हुन् ।
वैशाखदेखि असारको अन्त्यसम्म नेपाली चलचित्रको बजार हेर्ने हो भने, निकै कमजोर छ । अहिलेसम्म जम्मा २ वटा चलचित्रले मात्र लगानी उठाएका छन् । अरु सबै चलचित्रले निर्मातालाई घाटाको व्यापार दिएका छन् ।
साउन २१ गते रिलिज हुने चलचित्र ‘एक पल’ले व्यापार गतिलो गरेको अवस्थामा यसका कलाकारलाई फाइदा हुनेछ । निरन्तर असफल चलचित्र दिएर चर्चाविहिन बनेकी नायिका जेनिशा केसीलाई यो चलचित्रले राहत दिनसक्छ ।
राम महर्जन, जेनिशा केसी, आकाश जंग शाहको मुख्य भूमिका रहेको यो चलचित्रका निर्माता आरएल महर्जन हुन् । नेपाली चलचित्र एक अर्कासँग जुध्नु त कुनै नौलो कुरा होइन । अन्य २ चलचित्रसँग भिडन्त गर्न तम्तयार भएको चलचित्र ‘एक पल’ले दर्शक हलसम्म तान्ने मुख्य बाटो यसको एक्सन र गीतसंगीत हो ।
