Comments Add Comment

मनमोहन अस्पताल लेनदेन गर्ने गोविन्द केसी को हुन् ?

सम्झौता जुस खाने मेलो होः हामी हाम्रो सम्पत्ति बेच्दैनौं

rajendra pandey

 डा.गोविन्द केसीले सरकारसँग सम्झौतामा हस्ताक्षर गरेर त्रिवि शिक्षण अस्पतालमा जुस पिउँदै गर्दा केसीको निशाना बनेको मनमोहन सहकारी अस्पतालका अध्यक्ष राजेन्द पाण्डे नयाँ बानेश्वरमा भेटिए ।

रोचक त के छ भने पाण्डे आफू प्रमुख रहेको मनमोहन अस्पताल र मेडिकल कलेज वीर अस्पताल (न्याम्स) ले किन्ने गरी भएको सम्झौता र केसीको अनसन तोडिएको बारे बेखबर रहेछन् ।

एमाले नेता पाण्डेले कसैको निजी र सहकारी सम्पत्ति बेच्ने अधिकार कुनै निकायलाई नभएको भन्दै केसीसँगको सम्झौता अनसन तोड्ने बाहानामात्रै रहेको दाबी गरे । यो सम्झौताले डा. गोविन्द केसीका आजसम्मको अनसन मनमोहन अस्पताल विरुद्धमात्रै थियो भन्ने उनी आफैंले पुष्टि गरेको पाण्डेको तर्क छ ।

नेपाल स्वास्थ्य सेवा सहकारी लिमिटेडका अध्यक्ष एवं धादिङ क्षेत्र नम्बर-३ का प्रत्यक्ष निर्वाचित सांसद पाण्डेले गोविन्द केसी स्वास्थ्य क्षेत्रका माफियाबाट परिचालित रहेको आरोपसमेत लगाए ।

डा. केसीसँगको सम्झौताको मुख्य बुँदा मनमोहन प्रकरण पाण्डेले अस्वीकार गरेसँगै केसीसँगको पछिल्लो सम्झौता पनि अनसन तोड्ने उपायमात्रै बन्ने खतरा बढेको छ । प्रस्तुत छ, एमाले नेता पाण्डेसँग अनलाइनखबरकर्मीले गरेको कुराकानीः

मनमोहन अस्पताल र मेडिकल कलेज त अब सरकारले लिने गरी सम्झौता भएछ, तपाईहरुका लागि सेफ ल्याण्डिङ र गोविन्द केसीको प्रतिष्ठा दुबैको सम्बोधन भयो होइन त अब ?

यसबारे हामीलाई कुनै जानकारी छैन र सरोकार पनि छैन । गोविन्द केसी अनसन बसेको सुनिएको थियो, दुई चारदिनपछि उनलाई अनसन तोड्न बहाना चाहियो, आफैंले माग राख्ने, आफैंले सम्झौता गर्ने र अनसन तोड्ने कुरामा हामीलाई चासो छैन ।

तर, मनमोहन अस्पतालसम्बन्धी सहमति त भएको हो नि ?

वास्तवमा यो सहमतिचाहिँ उनलाई जुस खुवाउने मेलो मात्र हो । हाम्रो सम्पत्ति बेच्ने अधिकार कसैलाई छैन, यो संविधानप्रदत्त अधिकार हो । जुन सम्झौता गरियो भनेर तपाईले भन्नुभयो, त्यसप्रति हाम्रो कुनै सहमति छैन र हामीलाई जानकारी पनि छैन । कसैलाई बेच्न भनेर हामीले अस्पताल बनाएको होइन, यो सहकारीको सम्पत्ति हो ।

तर, अनसनको एउटा माग त्यो पनि थियो, त्यो नै नमानेपछि सम्झौताको के अर्थ ?

अनसनको नाटक र त्यसपछिका कथित सम्झौतासँग हामीलाई कुनै सरोकार छैन । अनसन त टुँडीखेलमा पनि थियो । प्रधानमन्त्रीविरुद्ध अविश्वास प्रस्ताव आएपछि टुँडीखेलको अनसन टुंगियो, हिजो प्रधानमन्त्रीले राजिनामा दिएलगत्तै टिचिङ अस्पतालको अनसन टुंगियो । यो संयोगमात्रै होइन, यी दुवै अनसन कुनै उद्देश्यबाट सञ्चालन भएका हुन् भन्ने प्रष्ट भइसकेको छ ।

तर, मनमोहन प्रतिष्ठान सरकारले नै मनमोहनका नाममा चलाउने र तपाईहरुको सम्पत्ति किन्ने कुराले त तपाईहरुलाई बैंकको ऋणबाट मुक्त हुने मौका दिएन र ? फेरि किन यसको विरोध गरेको ?

गोविन्द केसीको अनसन मनमोहन अस्पताल विरुद्धमात्रै थियो र उनको एकमात्र उद्देश्य मनमोहन स्वास्थ्य विज्ञान प्रतिष्ठानलाई रोक्नु थियो । हामीले यो कुरा पहिलेदेखि नै भन्दा अरुले पत्याएनन् । तर, आज उनी आफैंले मनमोहन प्रतिष्ठान सरकारले लिने भन्ने बुँदा आउनासाथ हतार-हतार हस्ताक्षर गरेर अनसन तोड्नुले यो कुरा त प्रष्ट भयो । आखिर खास्टोले छोपेर राखेको बिरालोले म्याउ गरिहाल्यो ।

जुन माग राखेर अनसन भएको हो, त्यही सम्झौता नै तपाईहरुले मान्दिँन भन्दा अनसनकारीमाथि धोका भएन र ?

हामीले उनका माग पूरा गर्ने ठेक्का लिएका छौं र ? हाम्रो सम्पत्ति बेच्ने अधिकार कसैलाई छैन । हामी त्यो मान्दैनौं । हामीले ०६४ सालमा सहकारीका नाममा आशयपत्र लिएर ०७० सालमा सबै पूर्वाधार तयार पारेपछि शिक्षा मन्त्रालय, नेपाल मेडिकल काउन्सिल र त्रिभुवन विश्व विद्यालयले निरीक्षण गरेका हुन् ।

सबैले मेडिकल कलेजको सम्बन्धन दिन उपयुक्त हुन्छ भनेपछि ०७१ साल कात्तिकमा आइओएमको १६९ औं बैठकले सम्बन्धन दिन लाग्दा गोविन्द केसीले रोक्नका लागि अनसन शुरु गरे ।

यसलाई बीचमै जबर्जस्ती रोकेर केदारभक्त माथेमा कार्यदल मार्फत हामीविरुद्ध षडयन्त्र गरियो । माथेमा कार्यदलको रिपोर्टलाई आधार बनाएर पहिले नै पूर्वाधार तयार भएको प्रतिष्ठानलाई रोक्नु भूतप्रभावी हो । यी सबै घटनाक्रमले अनसन विशुद्ध मनमोहन मेडिकल कलेज रोक्नकै लागि हो भन्ने प्रष्ट हुन्छ ।

तर, यो सम्झौताले तपाईहरुलाई ऋणबाट मुक्त हुनका लागि सेफल्याण्डिङ त हुन्थ्यो नि हैन र ? आखिर तपाईहरुले सम्बन्धन पाउने होइन क्यारे ?

हामीलाई कसैको निगाह चाहिएको छैन र ‘रेस्क्यु’ गर्नु परेको पनि छैन । संविधानले दिएको अधिकार र सरकारले दिएको अनुमतिका आधारमा हामीले काम गरेका हौं ।

सम्बन्धन नदिए पनि संसदमा प्रस्तुत मनमोहन स्वास्थ्य विज्ञान परिषद विधेयक संसदको सामाजिक न्याय समितिमा विचाराधीन छ । यसले कसैबाट सम्बन्ध लिनु नपर्ने र दिन पनि नपाउने भन्छ । हाम्रो अस्पताल प्रचण्डलगायत नेताहरुले निरीक्षण गरिसक्नुभएको छ । यो विधेयक पारित हुन्छ ।

तर, यो त समस्या समाधानको कुरा भएन, फेरि अनसन होला नि ?

गरे भैगो नि । आठौंपटक थियो, अब नवौंपटक हुन्छ । एउटा कुरामा तपाई पत्रकारहरु पनि के स्पष्ट हुनुपर्छ भने गोविन्द केसीको अनसनको उद्देश्य स्वास्थ्य क्षेत्रको सुधार हुँदैहुँदैन । मनमोहन मेडिकल कलेजलाई कुनै पनि हालतमा आउन नदिने कसम खाएर थालिएको हो यो अनसन । डा. केसी एमाले र मनमोहनप्रति अत्यन्तै पूर्वाग्रही छन् । उनको अनसनले नेपालको चिकित्साक्षेत्र ध्वस्त हुँदैछ ।

तर, केसीको अनसन त मेडिकल क्षेत्रको सुधारकै लागि हैन र ?

उनी सुधारका लागि भन्छन् । तर, उनको माताहतको शिक्षण अस्पतालको अर्थोपेटिक विभागको अवस्था सुधार गरेर देखाउन चुनौति छ मेरो ।

तपाई डा. केसीको अनसन एमालेविरुद्ध हो भन्नुहुन्छ, तर उनले तपाईलाई एमालेभित्रका मेडिकल माफिया भनेका छन् त ?

उनी र उनको गिरोह एमालेलाई कसरी बद्नाम गराउन सकिन्छ भनेर विभिन्न मुद्दा उचालेर हिँडेका छन् । यसपटक एमाले विरुद्धको लडाइँ हो भनेर उनका केही प्रवक्ताले भनेरै पुष्टि गरिसके ।

माफिया को हो भन्ने प्रष्टै छ । गोविन्द केसी माफियाबाट सञ्चालित छन् । उनको अनसनले नेपालबाट वर्षेनी ३ हजार विद्यार्थी मेडिकल पढ्न विदेशिएका छन् । त्यसवापत विदेश पठाउने परामर्शदाताले करोडौं कमाउँछन्, तिनीहरु नै केसीको अनसनका प्रायोजक छन् ।

मनमोहन मेडिकल कलेजले सरकारले तोकेको भन्दा १० लाख सस्तोमा वर्षमा एक सयजना विद्यार्थी पढाउछौं भन्दा माफियाहरुले अनसन गराएका हुन् ।

यो त अनसनमा बस्ने व्यक्तिको निष्ठामाथि नै अमानवीय र निराधार हमला भएन र ?

तपाईको अनलाइनखबर धेरैले पढे, एक नम्बर अनलाइन भयो भनेर कुनै सन्की व्यक्ति रिसले अनसन बस्ला । अनि, अनसनकारीको माग पूरा गर्न भन्दै अनलाइनखबरलाई सञ्चार मन्त्रालयले किन्ने गरी अनसनकारी र सरकारवीच सम्झौता भयो भने तपाईहरु मान्नुहुन्छ ? हो, यो पनि त्यस्तै हो । हाम्रो अस्पताल बेच्ने-नबेच्ने अधिकार हामीलाई मात्रै छ । यसबारेमा हामीसँग कुनै सम्झौता भएको छैन ।

जहाँसम्म अनसनको कुरा छ, गोविन्द केसीको अनसन अचम्मको छ । अनसन बसेको दुई/तीन दिनभित्रै उनलाई स्लाइन चढाएर ग्लुकोज दिन थालिन्छ । ग्लुकोज लगाएपछि त दुई तीन वर्ष पनि अनसन बस्न सकिन्छ । यो आमरण अनसन होइन, माफियाको ढोंग हो ।

तपाईले यसो भन्न कसरी मिल्छ ? पूर्वमुख्यसचिव लीलामणि पौडेलजस्ता प्रवुद्ध व्यक्तिहरुले समेत तपाईलाई हठ छाड्न आग्रह गरेको तपाईलाई सम्झना छ ? तपाई कसैको कुरा नसुन्ने ?

पहिलो कुरा उनी पनि ढोंगी व्यक्ति हुन् । मिडियामा सेलिब्रेटी हुन जे कुरा बिक्छ त्यही गर्ने उनको बानी हो । आफ्नो भर्‍याङमुनिको फोहोर सफा नगर्ने तर अरुतिरको फोहोर सफा गर्छु भन्दै मिडियाको ध्यान खिच्ने उनको प्रवृत्ति हो ।

जहाँसम्म मैले सुन्ने कि नसुन्ने भन्ने छ, मनमोहन अस्पताल मेरो व्यक्तिगत होइन । करीव २५ सय शेयर होल्डरको सहकारी हो । हामीले संविधान र कानुनले दिएको अधिकार प्रयोग गरेर चलाएका छौं । यसमा कसैले आँखा लाउँदैमा हामीले छाडेर हिँड्दैनौं ।

आज गोविन्द केसीको समर्थनमा हजारौं मान्छे छन्, यसरी तपाईले सिधै अस्वीकार गर्दा तपाईको राजनीति कहाँ पुग्ला ? आगामी चुनावमा कस्तो असर पार्ला ?

मलाई के कुरा प्रष्ट थाहा छ भने गोविन्द केसीका समर्थक एमालेलाई कहाँनिर हानौं भनेर ढुकेर बस्नेहरु हुन् । मलाई भोट दिने र मलाई जिताउने जनताले राजेन्द्र पाण्डे को हो भन्ने चिनेका छन् । ०४३ सालदेखि आजसम्म करीव ३० वर्ष म त्यहाँका जनताबाट निर्वाचित भएको राजनीतिक कार्यकर्ता हुँ । मेरा जनता मेरो पक्षमा छन् । मलाई ड्यामेज गर्न मेरो विरुद्ध फेसबुके र ट्वीटेले लेखेर मलाई केही हुन्न । जोजो फेसबुकमा मेरा विरुद्ध लेख्छन्, तिनीहरुले आजसम्म जनताका निम्ति केही काम गरेका छैनन् ।

म मलाई भोट दिने जनताप्रति बफादार छु, धादिङका जनताले माया गरेका छन्, फेसबुकेले के लेखे भनेर म हेर्दिँन ।

यो खबर पढेर तपाईलाई कस्तो महसुस भयो ?

ट्रेन्डिङ

Advertisment