११ साउन, सप्तरी । उमेर २० बर्ष पूरा भएको छैन । तर, गम्भीर अपराधमा संलग्ने भएको अभियोगमा तीन जना किशोर पक्राउ परेका छन् ।
जिल्लाको रौतहट गाविस २ का दिलिप कुमार दास, जितेन्द्र कुमार दास र अरबिन्द दास बालक अपहरणको आरोपमा पक्राउ परेका हुन् । तीनै जनाको उमेर २० बर्ष पूरा समेत भएको छैन । दिलिपको उमेर १८ बर्ष, जितेन्द्रको उमेर १६ बर्ष र अरबिन्दको उमेर १५ बर्ष रहेको छ ।
तीनै जना मिलेर गाउँकै आफन्त पर्ने गंगाई दासका ८ बर्षीय छोरा सिकेन्द्र दासलाई गत साउन ६ गते अपहरण गरेका थिए । घर नजिकैको चौरमा खेल्दै गरेका सिकेन्द्रलाई तीन जना मिलेर मोटरसाइकलमा बसाई भारतको जटहीमा लगेर राखेका थिए ।
बालक अपहरण पश्चात उनीहरुले अरबिन्दको मोवाइलबाट बालकका काका झाबर दासलाई साउन ७ गते फोन गरी १५ लाख फिरौति माग गरेका थिए ।
अपहरणमा संलग्न जितेन्द्र अपहरित बालकका काकाका छोरा हुन् । बालक अपहरण भएको सूचना प्राप्त हुनासाथ सादा पोशाकमा खटिएको प्रहरीले लोकेसन ट्रेस गरी उनीहरुलाई नियन्त्रणमा लिई बालकको उद्वार गरेको प्रहरी उपरीक्षक भीम ढकालले जानकारी दिए ।
बालकको अपहरण गर्न स४प ३९३३ नम्बरको मोटरसाइकल प्रयोग भएको प्रहरी अनुसन्धानबाट खुलेको छ । चौरमा खेलिरहेका बालकलाई जितेन्द्रले उनलाई ललाई फकाई कोदरकटी बजारसम्म लिएर गाएका थिए । त्यहाँ अरबिन्द दास र दिलिप दास मोटरसाइकल लिएर बसेका थिए ।
दिलिपले चलौको मोटरसाइकलको बीचमा बच्चालाई राखेर अरबिन्द दास पछाडि बसेर बालकलाई भारतको लौकहा हुँदै जटहीमा लगेर राखेका थिए ।