११ साउन, काठमाडौं । नेपाली कांग्रेसले बिभिन्न जिल्लामा बाढी र पहिरोले पुर्याएको क्षतिप्रति दुःख व्यक्त गर्दै पीडित परिवारहरुलाई उद्धार, राहत लगायतका काममा सहयोग गर्न सरकारसँग माग गरेको छ ।
साथै वेपत्ताहरुको तत्काल खोजी गर्न पनि कांग्रेसले सरकार र सम्बन्धित पक्षसँग आग्रह गरेको छ ।
‘प्राकृतिक विपतमा परी मानिसहरुको अनाहकमा ज्यान गएको र हजारौंको संख्यामा मानिसहरु विस्थापित हुनु परेको घटनाप्रति नेपाली कांग्रेसको ध्यानाकृष्ट भएको छ र यो विपतप्रति नेपाली कांग्रेस गहिरो दुःख व्यक्त गर्दछ,’ कांग्रेस केन्द्रीय कार्यालयका मुख्य सचिव कृष्णप्रसाद पौडेलद्वारा मंगलबार जारी विज्ञप्तिमा लेखिएको छ ।
कांग्रेसले बाढीबाट मृत्युवरण गरेका सबैप्रति श्रद्धाञ्जली अर्पण गर्दै स्थानीय पार्टी निकायहरु तथा भातृ एवं शुभेच्छुक संघ संस्थाहरुलाई पीडित परिवारको उद्धार र राहत कार्यमा आवश्यक सहयोग पुर्याउन आग्रह गरेको छ ।
