१० भदौ, काठमाडौं । संस्कृति, पर्यटन तथा नागरिक उड्डेयन मन्त्री जीवनबहादुर शाहीले पर्यटन विकासलाई लक्षित गरेर परिणाममूखी काम गर्न मातहतका कर्मचारीहरुलाई निर्देशन दिएका छन् ।
पदभार ग्रहणपछि कर्मचारीहरुलाई निर्देशन दिँदै मन्त्री शाहीले मुलुकको आर्थिक समृद्धिको मुख्य आधार नै पर्यटकको संख्या बृद्धि गर्नु भएकाले त्यहिअनुसार काम गर्न निर्देशन दिएका हुन् ।
‘विज्ञ तपाईंहरु नै हो, सबै मिलेर पर्यटन विकासमा जोड गरौं, योजना ल्याउनुस्,’ मन्त्री शाहीले भने, ‘कानुनी जटिलता भए म फुकाउँछु, प्रक्रिया पुर्याउने भन्दै सुस्ताएर भएन ।’
मन्त्री शाहीले पर्यटन विकासका लागि पूर्वाधार निर्माण गर्न र प्राकृतिक तथा साँस्कृतिक सम्पदाको संरक्षणमा ध्यान दिन पनि निर्देशन दिएका छन् । उनले पर्यटन विकासका लागि हवाइसेवाको विस्तारमा जोड दिनेसमेत बताए ।
यस्तै मन्त्री शाहीले आफ्नो कार्यकालमा महत्वपूर्ण उपलब्धी हासिल गर्ने लक्ष्य रहेकाले साथ दिन कर्मचारीहरुसँग आग्रहसमेत गरेका थिए ।